Оқ уй матбуот котибининг қариндоши ICE томонидан ушланди

Гап Бруна Кэролайн Феррейра ҳақида кетмоқда – у Ливиттнинг акаси Майкл Ливиттнинг собиқ турмуш ўртоғи ва унинг 11 ёшли ўғлининг онасидир. Бола туғилганидан бери асосан Ню-Гэмпшир штатида отаси билан яшаб келган, онаси эса у билан алоқасини сақлаб турган. Феррейра ва Каролайн Ливитт бир неча йилдан бери бир-бири билан гаплашмагани айтилмоқда. 

Ички хавфсизлик вазирлиги (DHS)га кўра, Феррейра 1999 йилда муддати тугаган туристик B2 визасидан сўнг АҚШни тарк этмаган ва «ноқонуний равишда қолиб кетган бразилиялик фуқаро» сифатида тавсифланган. Шунингдек, расмийлар унинг олдинги жиcмоний зўравонлик билан боғлиқ ушланиши ҳақида ҳам гапирган. Ҳозирда у Луизиана штатдаги ICE ҳибс марказида сақланмоқда ва депортация қилинади.

Бироқ Феррейранинг адвокати Тодд Померло бу маълумотларни рад этмоқда. Унинг сўзларига кўра, мижозининг жиноий ўтмиши йўқ, ва у «жиноий ноқонуний муҳожир» эмас. Феррейра болалигида ота-онаси томонидан АҚШга олиб келинган ва кейинчалик болалигида келган муҳожирлар учун мўлжалланган DACA дастурида иштирок этган. Трампнинг биринчи президентлик муддати даврида ушбу дастурни тугатишга уринишлар сабаб у ўз мақомини вақтида узайтира олмаган. Ҳозирда эса у АҚШ фуқаролигини қонуний тартибда олиш жараёнида экани таъкидланади. 

Феррейра 12 ноябр куни Бостон яқинида, Массачусетс штатида, Ню-Гэмпширдаги ўғлини мактабдан олиб кетиш учун кетар экан тўхтатилган ва ICE ходимлари томонидан ушланган. У билан қўшма васийлик ҳуқуқига эга бўлган Майкл Ливитт бу вазиятда энг катта хавотири ўғлининг руҳий ҳолати ва хавфсизлиги эканини айтган. 

DHS вакилларидан бири AP агентлигига изоҳ бериб, DACA дастури депортациядан тўлиқ ва автоматик ҳимоя бермаслигини, шунингдек, у АҚШда тўлақонли ҳуқуқий мақом тақдим этмаслигини эслатди. Бу иш Трамп маъмуриятининг кучайган депортация сиёсати ҳатто Оқ уй юқори лавозимдаги амалдорларига қариндош бўлган муҳожирларга ҳам таъсир қилаётганини кўрсатиб турибди.