Ҳонгконгдаги турар жой мажмуасида ёнғин: камида 94 киши ҳалок бўлди

Ҳонгконгда турар жой мажмуасида содир бўлган йирик, вайронкор ёнғин оқибатида камида 94 киши ҳалок бўлди, яна 80 дан ортиқ киши, жумладан ўт ўчирувчилар ҳам, турли даражада жароҳат олди. Бу ҳақда жума куни, 28 ноябр куни эрталаб маҳаллий ОАВ тезкор хизматларга таяниб хабар берди.

Шаҳарнинг шимолида жойлашган Тай По туманида 26 ноябр, чоршанба куни чиққан ёнғин тезлик билан бамбукдан қилинган қурилиш ҳавозалари бўйлаб тарқалган ва бир неча кўп қаватли биноларга ўтиб кетган. Ўт ўчириш хизмати маълумотларига кўра, ёнғин Wang Fuk Court турар жой мажмуасининг саккизта корпуcидан камида бештасини қамраб олган. Ҳалок бўлганлар орасида ўт ўчирувчи ҳам бор — у ёнғинни ўчириш пайтида жамоаси билан алоқа узилиб қолган, кейинроқ эса танасида ёнғиндан қолган излар билан топилган.

Ҳокимият бу ёнғинга энг юқори — бешинчи хавф даражасини берди. Ҳонгконгда ёнғинга бундай категория сўнгги марта 2008 йилда берилган эди.

Ўт ўчириш хизмати раҳбарининг ўринбосари сўзларига кўра, ёнғин шамол ва учиб кетган парчалар сабаб «жуда катта тезлик» билан тарқалган. Ёнғиннинг расмий сабаби ҳали аниқланмаган. Илгари маҳаллий аҳоли яқин атрофда ишлаётган ишчиларнинг иш вақтида сигарет чекишидан шикоят қилгани ҳақида South China Morning Post нашри хабар берди.

Шунингдек, ёнғин билан боғлиқ ҳолда эҳтиётсизлик ортидан одам ўлимига сабаб бўлганликда гумон қилиниб уч нафар эркак ушлангани ҳам маълум қилинди.

Ҳонгконгда дунёда аҳоли энг зич яшайдиган турар жой бинолари жойлашган. Илгари бу шаҳарда ўлимга олиб келувчи ёнғинлар, айниқса камбағал туманларда, тез-тез учраб турарди. Бироқ сўнгги ўн йилликларда хавфсизлик чоралари сезиларли даражада кучайтирилди ва бугунги кунда Ҳонгконг турар жой кварталларидаги йирик ёнғинлар анча камайган ҳисобланади.