WSJ: уруш ҳолатида НАТО шарққа 800 минг аскарни кўчиради

Россия билан уруш юз берган тақдирда НАТО таркибидаги германиялик, америкалик ва бошқа ҳарбий хизматчилардан иборат 800 минг қўшин шарққа, фронт чизиғи томон кўчирилиши лозим. Бу ҳақда 1200 бетдан иборат «Германия оператив режаси» (қисқача OPLAN DEU) деб номланган ҳужжатга таяниб, 27 ноябр, чоршанба куни The Wall Street Journal (WSJ) нашри хабар берди.

Ушбу ҳужжат бундесвернинг ҳудудий мудофаа штаби бошлиғи, генерал-лейтенант Андре Бодеман раҳбарлигидаги муаллифлар гуруҳи томонидан ишлаб чиқилган, у бир вақтлар Косово ва Афғонистонда вазифалар бажарган.

Бранденбург жамият ва хавфсизлик институти директори Тим Штухтай таъкидлашича, Россия билан тўқнашув қаердан бошланишидан қатъи назар, Шимолий Атлантика иттифоқи (НАТО) қўшинлари барибир Германия ҳудудини кесиб ўтишига тўғри келади.

Берлин баҳоларига кўра, Германиядаги автомагистралларнинг 20 фоизи ва улар устидаги кўприкларнинг чоракдан кўпроғига узоқ йиллик молия етишмаслиги шароитида таъмирлаш талаб этилади. ГФРнинг Шимолий ва Болтиқ денгизи соҳилидаги портларини таъмирлаш учун тахминан 15 млрд евро керак, шундан 3 млрд евро иккиламчи (фуқаро–ҳарбий) мақсадларда фойдаланиладиган инфратузилмани, жумладан докларни модернизация қилишга сарфланиши кўзда тутилган.

Узоқ муддатли истиқболда Берлин 2029 йилгача инфратузилма лойиҳаларига 166 млрд евро сарфлашни режалаштирмоқда. Бу маблағнинг 100 млрд евродан ортиғи темирйўл тармоғини ривожлантиришга йўналтирилади, бунда аввало иккиламчи мақсадда фойдаланиладиган объектларга устувор аҳамият берилади.

Шу фонда бундесвер касалхоналар, полиция ва табиий офатлар оқибатларини бартараф этиш бўйича агентликларда брифинглар ўтказмоқда, федерал ерлар ва автомагистрал операторлари билан шартномалар тузмоқда, шунингдек ҳарбий колонналар учун транзит йўналишларини белгилаб чиқмоқда, деб ёзади WSJ.

OPLAN DEU устида иш 2023 йил март ойида бошланган. Бу — «совуқ уруш» давридан бери ГФР хавфсизлигини таъминлаш ва ҳарбий ҳужумлардан ҳимоя қилиш бўйича биринчи кенг қамровли режа. Генерал Бодеман таъкидлашича, Германиянинг муҳим инфратузилмаси — портлар, кўприклар, энергетика корхоналари диверсиялар, жумладан, эҳтимол, Россия махсус кучлари томонидан амалга оширилиши мумкин бўлган ҳужумлар таҳдиди остида.

Унинг сўзларига кўра, ГФРнинг вазифаси — логистик ҳабга айланиш, НАТО қўшинларини таъминлаш учун ҳимояланган таъминот йўлларини йўлга қўйиш. Бу орада эса бундесвер қўшинларининг салмоқли қисми таранглик кучайган тақдирда можаро ҳудудига кўчирилиши керак бўлади.

Бундесвер режасида Германия миллий хавфсизлигига таҳдид солувчи тўртта асосий турдаги хавф ажратиб кўрсатилган: ҳокимият қарорлари, жамоат фикри ва ОАВга таъсир кўрсатишга қаратилган дезинформация, энергетика, телекоммуникация ва бошқа танқидий аҳамиятга эга корхоналарга нисбатан киберҳужумлар, жосуслик, диверсиялар.

«Биз уруш ҳолатида эмасмиз, лекин анча вақтдан бери тинчлик ҳолатида ҳам эмасмиз», — деб хулоса қилди генерал-лейтенант Андре Бодеман.

Жорий йил ноябр бошларида бундесвер операциявий қўмондонлигини бошқараётган генерал-лейтенант Александер Золлфранк Reuters агентлигига берган интервюсида, агар Россия қайта қуролланишни давом эттирса, 2029 йилга бориб НАТОга қарши катта ҳужум уюштириш салоҳиятига эга бўлиши мумкинлигини айтди.

«Россия ҳозир нималарга эга ва бу билан нима қила олиши мумкин — шуларни ҳисобга олиш лозим», — деди Золлфранк. «Шундан келиб чиққан ҳолда, Россия НАТО ҳудудига кичик кўламда бўлса-да, эртагаёқ зарба беришга қодир, деб айтиш мумкин», — деб қўшимча қилди у.

Унинг таъкидлашича, Москва қарийб 20 йилдан буён Европадаги хавфсизлик архитектурасини ўзгартиришга қаратилган стратегик курсни амалга ошириб келмоқда ва Украинага қарши урушда улкан йўқотишларга қарамай, шу йўлдан чекинмаяпти. НАТО бунга фақат “аниқ қизил чизиқлар”ни белгилаш ва яхши тайёргарлик орқали рақибни тийиб туриш йўли билан қарши туриши мумкин, деб ҳисоблайди бундесвер генерали.