Қўшимча функционаллар
-
Тунги кўриниш
Тошкентлик Сергей: 38 ёшида Оқ уйгача келган Сержио Гор ўзи ким?
Сержио Гор ёки Сергей Гороховский. Оқ уйнинг кадрлар бўйича директори, Трампнинг Марказий ва Жанубий Осиё бўйича махсус вакили ва эндиликда АҚШнинг Ҳиндистондаги элчиси ҳам бўлган асли тошкентлик яҳудий сиёсий фигура. У 38 ёшидаёқ Оқ уйгача келолган Трампга содиқ амалдор. Хўш, бу натижага эришгунча асли исми Сергей бўлган Сержио қандай йўлдан юрди?
Америкада “Ўзбекистоннинг одами”
Ўзбекистондаги Америка элчихонасига кўра, Сержио Гор эндиликда АҚШ-Ўзбекистон ишбилармонлик ва инвестиция кенгашига ҳам раҳбарлик қилади. Айнан Тошкентда туғилган Сергей бугун АҚШ ҳукуматидаги Ўзбекистонга энг яқин бўлган одам, деб бемалол айтса бўлади.
Бир пайтлар тошкентлик бўлган яҳудий муҳожир Сержио бугун АҚШнинг бу минтақа бўйича сиёсатида асосий одамлардан бирига айланди. Бугун 38 ёшда бўлган Сержио Тошкентда туғилиб, ота-онаси билан Малтага кўчгач, Коспикуа порт шаҳарчасида катта бўла бошлайди. У Малтага борганида 8 ёш, оиласи АҚШга кўчганида эса 13 ёшда эди. Исроил фуқароси бўлган Сержионинг онаси Малтада бизнес билан шуғулланган, 1999 йилда эса улар Лос-Анжелесга кўчишга қарор қилишади. АҚШга борганида ҳам Сергей Гороховский бўлган йигитча матбуот ва сиёсий кайфиятни тушуна бошлагач исмини Сержио Горга айлантириб олади.
Жорж Вашингтон университетига қабул қилинганида Сержио аллақачон консерватив ғоялар тарафдорига айланган эди. Коллеж давриданоқ у республикачилар томонида бўлди ва талабалардан иборат “Ёш Америка жамғармаси”ни тузишга уринди.
2008 йилги президент сайловларида эса Гор Обамани қоралаш кампанияси бир қисмига айланди. Хусусан, ўша пайтда оғизга тушган Обаманинг кам даромадли оилалар ҳуқуқлари ва ижтимоий адолат масалалари билан шуғулланувчи нодавлат фаоллик ташкилоти билан алоқаларини бўрттиришга ҳаракат қилди. Яъни Обаманинг сайловолди кампанияси пулларидан бу ташкилотга 800 минг АҚШ доллари ўтказилганди. Бу катта сумма аслида фирибгарлик учун ишлатилганини гапирувчи танқидчилар қаторида 22 ёшли Сержио Гор ҳам бор эди.
Яҳудий муҳожирнинг бу қадамлари бекорга эмас, балки тезроқ кўзга ташланиб, амалдорга айланиш мақсадлари рўёби учун эди.
Капитолийдаги матбуотчилик йиллари
Ўқишни тугатганидан сўнг Гор кампус фаоллигидан Капитолийга ўтди, яъни Америка парламентига. Аёва штатидан Стив Кинг ва Миннесота штатидан Мишел Бахман республикачи конгрессменларнинг сўзловчиси сифатида ишлай бошлади. Бу даврда Обама билан мафкуравий қарама-қаршиликда Сержио Гор асосий хизматчилардан бўлди.
2013 йилга келиб у сенатор Ранд Полнинг сиёсий ҳаракатлар қўмитасига ўтди ва жамоатчилик билан алоқалар бўлимига раҳбарлик қилди. 5 йил давомида матбуот котиби сифатида ишлаган Гор хабар алмашиш қобилиятини ўстирди ва тезкор ходимга айланди. Лекин бу йиллар албатта силлиқ кечмаган, у ички низоларга ҳам аралашиб қолган пайтлар бўлди.
Трампнинг орбитаси: маблағ йиғиш ва нашр этиш даври
Горнинг энг катта қадамларидан бири 2020 йилда, Трамп ғалабаси молия қўмитасининг штаб бошлиғи лавозимига ўтганида эди. Яъни энди у Трамп жамоасига яқинлашди. Кўп ўтмай у кичик Доналд Трамп билан танишиб, турли брошюра ва сайловолди тарғибот материаллари, китобларини чоп этиш ишларига бош бўлди. Лекин Горнинг асосий мақсади китоб босиб ўтириш эмас, Трамп механизмидаги асосий ўйинчилардан бирига айланиш эди. Шунинг учун ҳам у қисқа муддатда Трампнинг ультра MAGA дастурини тўлиқ қўллай бошлади.
2024 йилги сайловларда ғалаба қозонган Трамп 2025 йил январида Оқ уйга қайтаркан, Гор унинг командасида кадрлар бошлиғи бўлди, яъни президентнинг кадрлар бўлими директори. Бу анчагина катта лавозим эди. Шу билан бирга Сержио энди катта масъулиятни ҳам бўйнига олган эди. Яъни Трампга содиқликни текшириб, керакли кадрларни жой-жойига қўйиш учун тавсия бериш лозим эди.
Лекин турли нашрларнинг ёзишича, Горнинг кадрлар бўйича ҳамма қарашлари ҳам жамоа билан мос келмади. Масалан, Илон Маск NASA раҳбарлигига билдирган номзодни Сержио Гор имкон қадар рад этишга уринди. Маск эса уни ўз ижтимоий тармоқларида «илон» деб атади.
Шу йилнинг август ойида президент Трамп Сержио Гор номзодини Марказий ва Жанубий Осиё бўйича махсус вакил ҳамда АҚШнинг Ҳиндистондаги элчиси бўлишга кўрсатди.
Трамп келгач Вашингтон-Деҳли муносабатлари чигаллашиб, бу алоқалар энди қайта тикланаётган бир онда Ҳиндистонга элчи бўлиш – катта дипломатик рол дегани. Горнинг бу лавозим учун мос кўрилиши эса ўз карьерасида инқилоб эди, яъни кечагина коллеж залларида фаол бўлган асли тошкентлик яҳудий энди АҚШ ташқи сиёсатида муҳим фигуралардан бири, муҳим лавозим эгасига айланмоқда. Америкаликлар кўз ўнгида бу драматик бўлиб кўринади.
Сержио Гор бугун Ўзбекистоннинг Америка ҳукуматидаги муҳим одами ҳам. Ҳафта бошида АҚШнинг Ўзбекистондаги элчихонаси энди у икки давлатнинг ишбилармонлик ва инвестиция кенгашига ҳам раис бўлганини эълон қилди.
Шу йилнинг сентябр ойида Ўзбекистон президенти БМТ бош ассамблеяси сессиясида қатнашиш учун Ню-Йоркка борганида, унга ажратилган қароргоҳда Гор билан ҳам кўришди. Ўшанда медиа Сержиодан фикр сўраганида, у Мирзиёев деярли ҳамма масалада гаплашганини билдирган.
Октябр охирида, президент Вашингтонга боришидан 1 ҳафта олдин Сержио Гор бошчилигидаги делегация Тошкентга келди. У анча илиқ кутиб олинган, президентга Трампнинг саломи билан совғаларини етказган Гор АҚШга қайтгач, Ўзбекистон яхшигина меҳмон қилганини айтиб қўйди.
Ўзбекистон ташқи ишлар вазирининг ўзи масалан Горни меҳмон қилиш ишларига бош-қош бўлди, ўзбек қўшиқчилари махсус вакил билан суратга тушиб, Instagram’га жойлади.
Ню-Йоркдаги тадбирлар доирасида АҚШ президенти минтақадан фақат битта, яъни Ўзбекистон президенти билан учрашишга вақт топди. Kun.uz’нинг Америкадаги манбаларига кўра, бу учрашувни белгилашда ҳам Сержио Горнинг ҳиссаси катта бўлган. Сўнгги дақиқаларда у Трампни айнан Мирзиёев билан учрашишга ундаган. Трамп Гор ҳақида яхши гаплар гапиради, мақтаб туради.
Ҳиндистонга элчилик
Сержио яқин орада элчилик лавозимига тўлиқ киришиш учун Ҳиндистонга келади. Ҳинд медиалари бу инсоннинг Ҳиндистонга элчи бўлганини турлича томондан ёритмоқда. Масалан, Times of India Горнинг бир вақтнинг ўзида икки вазифа – Марказий ва Жанубий Осиё бўйича махсус вакил ҳам эканлигидан хавотирда. Медиа буни бироз тушунарсиз, деб ёзган.
Free Press Journal нашри эса Сержиони дипломат одам эмас ва тажрибаси кам кадр, фақат Трампга яқин фигура дея баҳолаган.
The Quint нашри мақоласида эса бундай одамларнинг элчиликка тайинланиши рискларни келтириб чиқариши мумкинлиги ёзилган, айниқса Покистон билан алоқалар саҳифасида.
Ҳиндистонлик сиёсатчи Шаши Тҳарор фикрича, айнан Горнинг элчи бўлиши яхши сигнал. Чунки у ҳозирги АҚШ раҳбарига жуда яқин одам. Кўриниб турибдики, ҳинд томони Горга нисбатан тўла ижобий симпатияда эмас.
Ўзбекистонга келсак, ҳа, Гор Ўзбекистон учун Америкадаги асосий одамлардан бирига айланмоқда. Буни қўполроқ қилиб айтсак, Сержио Гор ёки ўтмишдаги Сергей Гороховский расмий Тошкентнинг Трамп жамоасидаги кўзи-қулоғи бўлмоқда.
Хўш, қандай қилиб 38 ёшида Гор Америкадек давлатнинг расмийлари ичида катта сиёсий фигурага айлана олди, гап унинг билимидами? Йўқ, биринчи навбатда Сержио аввал бошидан шу мақсад учун ҳаракат қилган. Горнинг траэкторияси Вашингтон учун янги куч динамикасини акс эттиради – бу медиани жуда яхши билиш, стратегия билан ҳаракатланиш ва битта идеологияга содиқ бўлиш. Факт шуки, Трампнинг командасида ишонган одамларидан бири собиқ Совет иттифоқида туғилган. Сайлов олдидан медиа бу сарлавҳага ҳам алоҳида урғу берганди. Ҳиндистон билан саҳифада нималар бўлиши номаълум, лекин Сержио Горнинг фамилияси ҳали матбуотда янграйди.
Шоҳрух Мажидзода тайёрлади.
