Америка делегацияси Зеленский билан учрашувни бекор қилган — ОАВ

Кремлда ўтган Америка — Россия делегацияси учрашувининг янги тафсилотлари пайдо бўлди. Уиткофф ва Кушнер Путин бошқа тадбирда нутқ сўзлагани учун у билан учрашувни бир неча соат кутиб қолган.

{Yii::t(}

Ўтказиб юбориш 6s

Ўтказиб юбориш

Трампнинг махсус вакили Уиткофф ва Путин ўртасидаги учрашув ҳақида Россия томонидан президент ёрдамчиси Ушаков баёнот берди. Унинг айтишича, Россия Украинадаги урушни тугатиш бўйича АҚШ илгари сурган дастлабки режадан ташқари тўртта алоҳида ҳужжат олган.

Америка нашрлари бу тўрт ҳужжат нима эканига ойдинлик киритди: ҳужжатлардан бирида Украина суверенитети, ВСУ қўшинлари сони ва украин рекаталарининг учиш масофаси муҳокама қилинган. Яна бир ҳужжатда ҳудудлар, қолган икки ҳужжатда иқтисодий ҳамкорлик ва Европа хавфсизлиги ҳақида сўз борган. Ушаковнинг айтишича, Россия томони бу ҳужжатлардаги аниқ деталларни муҳокама қилмаган, шунчаки ҳужжатларда умумий нима ёзилгани ҳақида фикр алмашилган.

Зеленский билан учрашув бекор бўлди

Америка нашрларининг ёзишича, Уиткофф ва Кушнер Кремлда Путин билан учрашганидан кейин Европадаги давлатлардан бирида, катта эҳтимол Белгияда, Украина президенти Володимир Зеленский билан учрашиши керак бўлган. Лекин, яна ўша Америка нашрларининг ёзишича, Трампнинг вакиллари русларнинг илтимосига кўра Зеленский билан учрашувни бекор қилган.

Аслида музокарачилар аввал бир давлат, кейин бошқа давлат етакчиси билан учрашиши керак, тўғрими? Яъни Уиткофф ва Кушнер Зеленскийнинг олдига бориб «Путин бундай деди, сизнинг позициянгиз қанақа?» деб сўраши керак. Лекин Трампнинг дўсти ва куёви Кремлдан чиқибоқ чемоданини йиғиштириб Америкага жўнаб қолган. Кўриниб турибдики, Трампнинг музокарачилари урушни фақат ва фақат Путинга ёқадиган гаплар айтиш орқали тугатиш мумкин деб ҳисобламоқда.

Айтганча, Уиткофф ва Кушнер эндиликда Украинадаги урушни тугатиш бўйича асосий музокарачига айланди. Трамп миллиардер дўстининг ёнига миллиардер куёвини ҳам қўшиб қўйди, ҳар эҳтимолга қарши. Зеленский билан учрашувни бекор қилган бу икки музокарачи Америкада Украина музокарачилари етакчиси Рустем Умеров билан учрашадиган бўлибди. Ўйлаб қарасак, бу мантиқан тўғри ҳам, чунки Уиткофф ва Кушнер сиёсий вазн жиҳатдан Умеров билан тенг, президент Зеленский билан эмас.

Вақт чўзишми?

Кремлнинг Америка делегацияси қабул қилингани ҳақида баёнотлари фарқли бўлди. Аввалига Юрий Ушаков чиқиб томонлар мақбул ечим топа олмаганини айтди. Кейинроқ Песков «Путин Американинг режасини рад этмагани, Кремл музокаралар тафсилотини очиқламасликни маъқул кўришини» айтди. Лекин товариш Песков, сиздан олдинроқ товариш Ушаков чиқиб музокарадаги энг асосий тафсилотни айтиб бўлди: Россия ва АҚШ келишув бўйича ҳар томонни қаноатлантирадиган ечим топа олмади.

Кейинчалик маълум бўлдики, Москва Вашингтонга режа устида мулоқотни давом эттириш таклифини билдирган. Бу манёвр эса бизга таниш, ҳозир узил-кесил йўқ дейишса, Украинага тескари бўлиб олган Трамп энди Россияни ёмон кўриб қолиши ва шунга қараб иш кўриши мумкин. Лекин «режангиз яхши, фақат унинг устида ишлаш керак», дейилса, муҳокамани исталганча давом эттириш мумкин.

Трамп яна Россия томонда?

Дунё сиёсатида Доналд Трампчалик ўзгарувчан одам йўқ, айниқса уруш музокаралари даврида у жуда кўп ўзгарди: бир қараса, Украинани уруш бошлашда айблайди, бир қараса Путинни танқид қилиб, Россияни «қоғоз йўлбарс» дейди. Ҳозир яна Украинани ёмон кўриш навбати келган кўринади. Трамп Оқ уйда журналистлар билан учрашув вақтида яна «Украинанинг қўлида ютуқли карта йўқлигини» айтди, худди 28 февралдагидек. Унинг оҳангидан яна Украинани айблаётганини тушуниш мумкин. Афтидан, Стив Уиткофф музокараларда очиқчасига Россияга ён босаётгани бежизга эмас, ўзининг таъбири билан айтганда, Уиткоффнинг босси ҳам ҳозир шунақа позицияда.

Қисқичбақали чебурек

Ҳар куни юзлаб украин ва рус аскарлари мантиқсиз уруш сабаб ўлишда давом этаётган, бу қирғинбаротни тугатиш учун чинакам имконият пайдо бўлган бир вақтда Россиядаги давлат нашрлари нимани муҳокама қилаётганини қаранг: Уиткофф ва Кушнер қайси ресторанда нима еганини.

Эмишки Трампнинг дўсти ва куёви Кремл яқинидаги Savva деган ресторанга кириб 25 минг рубл (325 доллар атрофида) тўлаб чиқишибди. Меҳмонларга иссиқ газак сифатида қисқичбақали мини чебурек, қўзиқоринли чучвара, иссиқ таом сифатида гречкали қийма бедана, кийик гўшти ва яна алламбало балиқли таомлар тортилибди. Қизиғи, ресторан эгаси мистер Уиткофф қовурилган, қарсилдоқ хамирни яхши кўришини ҳам биларкан. Албатта, кечки овқатга гречкани шоҳона таом деб бўлмайди, лекин уруш кетаётганда бундай деталларга меҳр билан тўхталиш... билмадим.

Тан оламан, менинг дунёга қарашим бошқача, мен уруш даврида, одамлар ўлаётганда бизнес ҳақида ўйлайдиган чиновникларни дунёдаги энг ёмон одам деб биламан. Менинг фикримча, дунёдаги энг қудратли давлатнинг 80 йил ичидаги энг катта урушни тугатиши мумкин бўлган музокарачилари фронтда ҳар сонияда одамлар ўлиб кетаётгани, ҳар сонияда аёллар бева, гўдаклар етим қолаётгани, оилалар пароканда бўлаётганини доим ўйлаши керак. Ҳар икки томонда — Россияда ҳам, Украинада ҳам одамлар мантиқсиз уруш сабаб ўлиб кетяпти. Жаноблар, ҳа, сиз бизнес одамларисиз, лекин окопда қотган нон еб жанг қилаётган минглаб рус, украин йигитлар сиз тўғри ишласангиз, тирик қолиши мумкин. Сиз ҳам уруш нималигини тушуниш учун ҳеч бўлмаса фронтдан олинган видеоларни кўринг, қотган нон еб кун ўтказинг окопдаги бўз йигитнинг аҳволини ҳис қилиш учун. Қисқичбақали чебурекни пишлоқли нон билан ейиш қочиб кетмайди, бунга урушдан кейин ҳам улгурасиз...

Ўткир Жалолхонов тайёрлади
Тасвирчи ва монтаж устаси — Фахриддин Ҳотамов