ЕИ РФнинг “соя флоти”ни санкция пакетларидан ташқари ҳам жазолайди

Эндиликда Европа Иттифоқи Россия нефтини ташувчи “соя флоти” кемаларига нисбатан санкцияларни санкция пакетларидан қатъи назар жорий қилади. Ёндашувни ўзгартириш нияти ҳақида жума куни, 12 декабрда, Брюсселда ЕИнинг бир нечта дипломатлари ва амалдорлари хабар қилди.

Бу йўналишдаги биринчи қадам 15 декабр, душанба куни ЕИ Ташқи ишлар бўйича кенгаши йиғилишида қўйилади. DW манбаларига кўра, санкция рўйхатига РФнинг “соя флоти”дан яна тахминан ўнтача кема киритилади. Шу билан бирга, 20-пакет санкциялар айнан шу куни қабул қилиниши кутилмаяпти, чунки уни муҳокама қилиш эндигина бошланмоқда.

Янги чеклов чоралари пакетлари устида иш кўпинча ойлаб чўзилиб кетиши сабаб, ЕИ янада мослашувчан ҳаракат қилишга қарор қилди. Дипломатлардан бири таъкидлашича, “соя флоти” кемаларини улар аниқланган заҳоти санкция рўйхатларига киритиш муҳим — бу РФга қарши санкцияларни айланиб ўтишга қарши самарали курашни давом эттиришга ёрдам беради. Яна бир манба эса бу чоралар Россия иқтисодиётига аллақачон сезиларли таъсир кўрсатганини айтган.

Бундан ташқари, эндиликда санкция пакетларидан ташқари тарзда “соя флоти”га кўмаклашувчиларга нисбатан ҳам санкциялар жорий этиш имкони пайдо бўлади, бироқ бунинг учун барибир ЕИ Кенгашининг якдил қарори талаб этилади.

Ташқи ишлар вазирлари, шунингдек, ҳудудий сувларда кемаларни текширишни кучайтириш масаласини ҳам муҳокама қилади. Хусусан, улар Франция мисолини кўриб чиқади: у Бенин байроғи остида сузаётган Boracay танкерини ушлаган. Франция қонунларига кўра, денгиз префекти ҳарбий офицерлар томонидан кема бортига чиқиш (текширув)га рухсат бериши мумкин, шундан кейин иш прокуратурага топширилади.

Бироқ бундай тартиб ЕИнинг барча мамлакатлари қонунларида назарда тутилмаган. Шунинг учун ЕИ ташқи ишлар вазирлари тажриба алмашишни ва умумевропача ёндашувни ишлаб чиқишни бошлаш ниятида.