Сўров: украинларнинг кўпчилиги армияни Донбассдан олиб чиқишга қарши

Украинларнинг учдан тўрт қисми (тахминан 75 фоиз) қуйидагиларни ўз ичига олган тинчлик режасини қабул қилиб бўлмайди деб ҳисоблайди: хавфсизлик кафолатлари бўлмаган, украин қўшинларини Донецк вилоятидан олиб чиқиш кўзда тутилган ва УҚК (Украина Қуролли кучлари) сонини чеклаш назарда тутилган режа. Бу ҳақда Киев халқаро социология институти 26 ноябрдан 13 декабргача Киев назоратидаги Украина ҳудудларининг барча минтақаларида 547 нафар респондент ўртасида ўтказган сўрови натижаларида айтилади. Тадқиқот натижалари 15 декабр, душанба куни эълон қилинган.

Респондентларнинг 72 фоизи эса қуйидаги шартларни ўз ичига олган тинчлик режасига рози бўлиши мумкинлигини билдирган: урушни ҳозирги фронт чизиғида “музлатиб қўйиш” ва Украина учун хавфсизлик кафолатлари — аммо оккупация қилинган ҳудудларни расман Россияники деб тан олмасдан. 14 фоиз иштирокчи бундай режани ҳам рад этган.

Сўровда қатнашганларнинг фақат 9 фоизи Россиянинг босқини 2026 йил бошигача тугайди деб ўйлайди. 14 фоиз — келаси йилнинг биринчи ярмида тугайди, деб ҳисоблайди. 11 фоиз — 2026 йилнинг иккинчи ярмини айтган, 32 фоиз эса 2027 йил ва ундан кейин деб жавоб берган. Ҳар учинчи респондент “билмайман” деб жавоб қайтарган.

Сўров шуни ҳам кўрсатганки, украинларнинг 63 фоизи урушга қанча керак бўлса, шунча чидашга тайёр. Яна 15 фоизи — олти ой ёки бир неча ой чидай олишини, 1 фоиз — тахминан бир йил чидай олишини айтган. 21 фоиз респондент бу саволга жавоб бера олмаган.

Президент Володимир Зеленскийга респондентларнинг 61 фоизи ишонади, 32 фоизи эса ишонмайди. Октябр бошида ишонч рейтинги деярли шу кўринишда бўлган: 60 фоиз ишонади, 35 фоиз ишонмайди.

Эҳтимолий президент сайловлари ҳақидаги саволга 57 фоиз иштирокчи сайловларни фақат тинчлик келишуви тузилиб, уруш тўлиқ якунлангандан кейин ўтказиш мумкин, деб жавоб берган. 25 фоиз — ўт очиш тўхтатилиб, хавфсизлик кафолатлари берилса, сайлов ўтказиш мумкин, деб ҳисоблайди. Фақат 9 фоиз украин эса жанг ҳаракатлари давом этаётган шароитда ҳам сайлов ўтказилиши керак, деб ўйлайди.