Полшада Ўзбекистон логистика ҳаби ташкил этилиши мумкин

Полшадаги элчихона дипломатлари ушбу мамлакат Қишлоқ хўжалигини ривожлантириш миллий маркази (KO WR) бош директори ўринбосари Луциан Зволак билан учрашиб, аграр соҳада ҳамкорликни кенгайтириш ва Ўзбекистон логистика маркази (ҳаб) ташкил этиш масалаларини муҳокама қилди.

Фото: “Дунё” АА

“Дунё” АА мухбири хабар қилишича, мулоқот чоғида Ўзбекистон ва Полша ўртасида қишлоқ хўжалиги соҳасидаги ҳамкорлик алоқаларини янада ривожлантириш йўналишлари кўриб чиқилди.

Музокаралар якунида томонлар қуйидаги келишувларга эришди:

KO WR'га тегишли бўлган Мазовия ва Лодз воеводаликлари чегарасида жойлашган икки бинодан бирини ўзаро тамойил асосида Ўзбекистон логистика маркази (ҳаб) учун ажратиш;
Ўзбекистондан Полшага ишчи гуруҳ ташрифи чоғида лойиҳа таклифларини шакллантириш;
Ўзбекистондан малакали ишчилар ёки аграр университетлар талабаларини KO WR'га қарашли 40 та қишлоқ хўжалигига ихтисослашган компанияларда мавсумий ишларга жалб этиш;
Полша компанияларининг 2026 йил 1–3 апрел кунлари Тошкентда ўтадиган UzFood – 2026 халқаро кўргазмасида иштирокини таъминлаш;
Ўзбекистон корхоналарининг AGROTECH (Келце, 2026 йил 13–15 март) ва POLAGRA (Познан, 2026 йил 23–25 сентябр) халқаро кўргазмаларда қатнашишини қўллаб-қувватлаш.

Учрашувда Луциан Зволак икки давлат ўртасидаги экспорт-импорт алоқалари йилдан йилга кенгайиб бораётганини таъкидлади. Жумладан, 2024 йилда Полшадан Ўзбекистонга 72 миллион евро қишлоқ хўжалиги маҳсулотлари экспорт қилинган, Ўзбекистондан Полшага мазкур маҳсулотлар импорти 10 миллион еврони ташкил этган. У келгусида ушбу кўрсаткичларни уч баробар ошириш учун имкониятлар мавжудлигини қайд этди.