“Украинская правда”: Тимур Миндич Исроилда

Киевдаги “Украинская правда” интернет-нашри журналистлари Исроилда Тимур Миндични аниқлаган. У — Украина президенти Володимир Зеленскийнинг узоқ йиллик сафдоши ва “Квартал 95” студиясининг ҳаммуассисларидан бири. Нашр ёзишича, Миндич “Энергоатом” давлат корхонасидаги коррупция иши доирасида унинг уйида тинтувлар ўтказилишидан бир неча соат олдин мамлакатдан чиқиб кетган. Бу ҳақда нашр 21 декабр, якшанба куни хабар қилди.

“Украинская правда” ўз мухбири олган, Миндич тасвирланган, деб таъкидланган фотосуратни эълон қилди. Унда соқоли оқара бошлаган, қуёшдан ҳимоя қилувчи кўзойнак таққан ва қора шапка кийган эркак акс этган. Сурaт қайси шаҳарда олингани мақолада аниқ кўрсатилмаган; шунингдек, видео олиш ёки бу шахс билан гаплашишга муваффақ бўлинган-бўлинмагани ҳам айтилмайди. Аммо журналистлар тафсилотларни кейинроқ ошкор қилишга ваъда берган.

Декабр ойи бошида, 2023 йил сентябридан бери бир неча айбловлар билан ҳибсда бўлган украин олигархи Игор Коломойский 28 ноябр куни Исроилда Миндичга нисбатан суиқасд қилишга уриниш бўлганини билдирган.

“Бу қотилликка уриниш эди, ҳужум қилганлар ҳибсга олинган. Натижада уй хизматкори оғир яраланган, лекин тирик қолган”, — дея олигархнинг сўзларини келтирган “Страна” нашри. Коломойскийнинг айтишича, қасд қилувчилар уйни адаштириб юборгани учун суиқасд муваффақиятсиз чиққан. Кейинчалик у ҳужумчилар қуролни гўё Украина элчихонасидан олганини ҳам қўшимча қилган.

Бироқ “Страна”нинг Миндич атрофидаги манбалари суиқасд бўлмаганини айтган, шунингдек “Миндичнинг ҳаёти ва соғлиғига ҳеч нарса таҳдид қилмаяпти”, деб билдирган. Исроил полицияси ҳам қотилликка уриниш ҳақида маълумотга эга эмаслигини айтган. Коломойский эса буни ҳодиса юзасидан текширувни мамлакат ички хавфсизлик хизмати олиб бораётгани билан изоҳлаган.

Ноябр ойи бошида Украина Миллий антикоррупция бюроси ва Махсус антикоррупция прокуратураси “Энергоатом” давлат компаниясида йирик коррупция схемаси фош этилганини маълум қилган. 10 ноябр куни ҳуқуқ-тартибот идоралари компаниянинг ўзида, шунингдек собиқ энергетика вазири Герман Галушченко ва Тимур Миндичнинг уйида тинтув ўтказган.

Миллий антикоррупция бюроси хабар қилишича, “жиноий ташкилотнинг асосий фаолият йўналиши ‘Энергоатом’ контрагентларидан шартнома қийматининг 10–15 фоизи миқдорида ноқонуний манфаатни тизимли равишда олиш бўлган. Хусусан, контрагентларга кўрсатилган хизмат/етказиб берилган маҳсулот учун тўловлар блокланишининг олдини олиш ёки етказиб берувчи мақомидан маҳрум қилинишдан қочиш эвазига пул тўлаш шартлари мажбуран юклатилган”, — дейилган баёнотда.

Володимир Зеленский 13 ноябр куни Украина Миллий хавфсизлик ва мудофаа кенгашининг Миндичга, шунингдек ушбу ишда тилга олинган ва мамлакатни тарк этган молиячи Александр Цукерманга нисбатан санкциялар жорий этиш ҳақидаги қарорини тасдиқлаган. Жазо чоралари уч йилга киритилган, аммо айрим чекловлар муддатсиз амал қилади.

Давлат раҳбарининг фармонидан келиб чиқишича, иккаласида ҳам Исроил фуқаролиги бор. 22 ноябр куни Миндич ва Цукерман қидирувга берилган, 19 декабр куни эса Украина Хавфсизлик хизмати Миндичга нисбатан давлатга хиёнат бўйича иш қўзғатгани маълум бўлган.