Янги конларни аниқлаш: Ўзбекистон–Миср ҳамкорлиги учун ишчи гуруҳ тузилади

Ўзбекистон Тоғ-кон саноати ва геология вазирлиги, Навоий кон-металлургия комбинати, Мисрнинг Endeavour Mining компанияси ҳамда халқаро консалтинг ташкилоти вакиллари иштирокида онлайн учрашув ўтказилди. Унда қимматли металларни излаш соҳасида ҳамкорликни кенгайтириш ва қўшма геология-қидирув ишлари учун техник ишчи гуруҳ ташкил этиш масаласи муҳокама қилинди.

Фото: "Дунё" АА

“Дунё” АА мухбири маълум қилишича, элчихона томонидан ташкил этилган учрашувда қўшма геология-қидирув ишларини амалга оширишнинг амалий ва инвестицияга йўналтирилган жиҳатлари кўриб чиқилди.

Томонлар янги фойдали қазилма конларини аниқлаш учун мустаҳкам асос яратиш мақсадида ўзаро манфаатли лойиҳаларга устувор аҳамият бериш бўйича якдил фикр билдирди. Таъкидланишича, мазкур ёндашув ҳамкорликда ишончлилик ва барқарор суръатни таъминлаб, уни кенгроқ тижорат ташаббусларига олиб чиқишга хизмат қилади.

Учрашув якунлари бўйича муҳим келишувлардан бири сифатида ҳамкор компаниялар, вазирлик ва тегишли мувофиқлаштирувчи тузилмалар вакиллари ҳамда тажрибали геология-қидирув мутахассисларини қамраб олган кичик, техник йўналтирилган ишчи гуруҳни тузишга келишиб олинди.

Маълум қилинишича, ишчи гуруҳнинг дастлабки вазифалари техник баҳолаш ишларини ўтказиш, устувор ер майдонларини аниқлаш ва кейинги қадамлар бўйича таклифлар ишлаб чиқишдан иборат бўлади.