Миндичнинг дараги чиқди. У Украинага қайтмоқчи эмас

Мустақил Украина тарихидаги энг жиддий сиёсий можаро марказида бўлган Тимур Миндич топилди. Уни Украина махсус хизматлари, Буданов бошчилик разведкачилар ёки полициячилар эмас, оддий украиналик журналист топди. Мухбир Миндични расмга олиб, ундан интервю олишга ҳам улгурди.

{Yii::t(}

Ўтказиб юбориш 6s

Ўтказиб юбориш

Исроил паспорти билан

Воқеа тафсилотларига тўхталишдан аввал Тимур Миндич ким эканини қисқача эслаб оламиз. Миндич президент Зеленскийнинг дўсти, у билан бирга машҳур «Квартал-95» студиясига асос солган одамлардан бири. Зеленскийни олигарх Коломойский билан айнан Миндич таништиргани айтилади. Украинлар орасида «Зеленскийни олигарх Коломойский президент қилган», деган миш-миш азалдан машҳур.

Ана шу Тимур Миндич оддий кинопродюсерликдан бир думалаб бутун бошли Украинага электр етказиб берадиган энг йирик ташкилот — «Энергоатом»нинг норасмий хўжайинига айланиб қолади. Уруш даврида мамлакат энерготизими доимий Россия ҳужумига учрагач, «Энергоатом» Украина учун энг муҳим стратегик объектлардан бирига айланди. Ҳатто ҳукумат қарори билан ҳеч ким «Энергоатом»дан суд орқали пул ололмаслиги белгиланди. Бир сўз билан айтганда, «Энергоатом» ҳеч ким теголмайдиган ташкилотга айланди.

Бундан фойдаланган президент Зеленскийнинг дўсти Тимур Миндич «Энергоатом» билан шартнома имзолайдиган ҳар бир ташкилотдан пора олиб, камида 100 миллион доллар пул ўғирлаган. Украина ҳукумати ва президентига бўйсунмайдиган мустақил аксилкоррупция ташкилотлари бу жиноятни очиб, расман тергов бошлашидан бир неча соат аввал Тимур Миндич тўрва-халтасини йиғиштириб, Исроилга қочиб кетганди. Украина ҳукумати уни қидиришга уринмади ҳам, лекин журналистлар бу ишни давлатнинг ўрнига бажариб, совуқда иссиқлик ва электрга эҳтиёжи ортган, тўрт йилдан бери урушиб ҳолдан тойган украин халқини ўмариб келган Миндични топди.

Демак «Украинская правда» газетаси журналисти Михаил Ткач қидирувда бўлган Тимур Миндични излаб, кутилганидек Исроилдан топди. Миндич яҳудий, унда Исроил паспорти ҳам бор. Шу учун урушаётган давлат фуқароларини ўмариб бўлгач, хотиржамгина Исроилга қочиб кетган.

Журналист билан суҳбатда Миндич ўзига қарши айбловларни «манипуляция» деб атаган. Ахир қайси коррупционер ўғри «Ҳа, мен камбағал халқнинг, етим болаларнинг, ёлғиз оналар, ногиронларнинг ҳаққини безбетларча ўмарганман, уруш кетаётгани ҳам мени тўхтата олмаган», деб айтарди?

Шунингдек, Миндич Украинага қайтиш нияти йўқлигини айтган. «Исроил фуқаролиги жуда қулай», дейди журналист. «УП» эълон қилган суратга қараганда, Миндич у билан гаплашишни истамаган. Лекин қайсар журналист интервю олишни уддалабди. Газета тез орада суҳбатни эълон қилади.

Урушаётган давлатни халқаро ҳамжамият олдида жуда қийин аҳволга солиб қўйган бу коррупцион можаро марказида турган шахсни топиб, у билан суҳбатлашиш катта иш. Бу учун «Украинская правда»нинг мард журналисти Михаил Ткачни табрикласак бўлади. У ҳамма ўз ишини тўғри бажарса, доим натижа бўлишини исботлади.

Украина ҳукумати тушунарли сабаб билан Миндични изламаётган, бу ишни унутишга интилаётган бир вақтда мустақил журналист Исроилгача бориб уни топгани ҳарбий цензура амалда бўлган уруш даврида ҳам Украина жамиятида демократик институтлар ишлаётганини кўрсатади. Демократия ана шунақа нарса: халқнинг пулини ўмарганларни қизаришга мажбур қилади, жамият демократияни қабул қилса, унинг қадриятларини топтамаса, халқни ўмариш деярли имконсиз ишга айланади. Кўрасиз, бу украинлар ҳукумат Миндични топиб қамагунча қўймайди...

Ўткир Жалолхонов тайёрлади
Тасвирчи ва монтаж устаси — Фахриддин Ҳотамов