ЗАЭС яқинида таъмирлаш давомида ўт очиш вақтинча тўхтатилди

Россия ва Украина Атом энергияси халқаро агентлиги (АЭХА) воситачилигида Запорижжя атом электр станцияси (ЗАЭС) ҳудудида электр узатиш линияларини таъмирлаш учун вақтинча ўт очишни тўхтатишга келишди. Бу ҳақда АЭХА бош директори Рафаэл Гросси якшанба, 28 декабр куни маълум қилди.

Агентлик хабарида: “Украинадаги ЗАЭС яқинида АЭХА воситачилигида эришилган навбатдаги маҳаллий ўт очишни тўхтатишдан сўнг электр узатиш линияларида энг муҳим таъмирлаш ишлари бошланди”, дейилади. АЭХА гуруҳи таъмирлаш ишларини кузатиб бормоқда, улар бир неча кун давом этиши кутилмоқда.

Шу вақт ичида ЗАЭСнинг тақсимлаш подстанциялари билан Запорижжя иссиқлик электр станцияси ўртасида электр энергияси узатилишини тиклаш режалаштирилган. АЭХА ижтимоий тармоқлардаги хабарида: “бош директор Гросси ҳар икки томонга ушбу янги вақтинча ‘сукунат даври’га рози бўлгани учун миннатдорлик билдиради”, дейилган.

Запорижжя АЭС — Европадаги энг йирик атом станцияси. У 6000 МВт умумий қувватга эга бўлган олтита энергоблокдан иборат. Станция Энергодар яқинида, қуриб бораётган Каховка сув омборининг жанубий соҳилида жойлашган. Россия 2022 йил март ойида, Украинадаги уруш бошланганидан кўп ўтмай, ЗАЭСни оккупация қилди ва уни “Росэнергоатом” бошқарувига ўтказди.

ЗАЭСдаги барча реакторлар тўхтатилган, аммо улар доимий совитишни талаб қилади. Совитиш тизими ташқи тармоқдан келадиган электр энергияси билан таъминланади. Агар электр таъминоти узилиб қолса, дизел генераторлар ишга туширилади. Уруш давомида станция бир неча бор ўққа тутилган, бу ҳужумларда Россия ҳам, Украина ҳам бир-бирини айблаб келади.

ЗАЭСни урушдан кейин ким бошқариши масаласи АҚШ воситачилигида Украинада тинчликка эришиш йўллари муҳокамасида асосий масалалардан бири ҳисобланади.