Зеленский Флоридада Трамп билан музокаралар якунларини эълон қилди

Украина президенти Володимир Зеленский душанба куни, 29 декабрда, бир кун олдин Флоридада АҚШ президенти Доналд Трамп билан бўлиб ўтган музокаралар якунларини сарҳисоб қилди. Зеленскийнинг айтишича, музокараларда Вашингтон кучли хавфсизлик кафолатларини тасдиқлаган. Томонлар урушдан кейин Украинани тиклаш йўлларини ҳам муҳокама қилган.

“Биз олдиндан ишлаб чиққан барча тафсилотлар — хавфсизлик кафолатлари бўйича техник ва музокара гуруҳларимиз тайёрлаган масалалар — у (Трамп — таҳр.) томонидан тасдиқланди ва улар АҚШ Конгрессига овоз беришга киритилишини ҳам тасдиқлади. Бу жуда кучли келишув”, — деб ёзди Зеленский.

Украинани иқтисодий жиҳатдан тиклаш масаласида эса чоралар АҚШ бизнесининг Украинани ривожлантириш ва тиклаш учун махсус шартлар асосида мамлакатга кириши, шунингдек АҚШ билан эркин савдо тўғрисидаги келишувни ишлаб чиқишни ўз ичига олиши айтилган.

Бундан ташқари, Зеленский ва Трамп 15 йиллик хавфсизлик кафолатлари бўйича келишиб олган, уларни узайтириш имкони ҳам назарда тутилган. Зеленский яна бир бор Трампдан бу кафолатлар муддатини 50 йилгача кенгайтиришни сўраганини билдирди. “Биз 30, 40, 50 йил вариантларини кўриб чиқишни жуда истаймиз — шунда бу президент Трампнинг тарихий қарори бўлар эди. Президент АҚШ бу ҳақда ўйлаб кўришини айтди”, — деб ёзди у.

Музокараларда президентлар кейинги ҳаракатлар тартибини ҳам муҳокама қилган. Яқин кунларда АҚШ ва Европа давлатларининг миллий хавфсизлик бўйича маслаҳатчилари даражасида учрашув ўтказиш режалаштирилган. Учрашув эҳтимол Украинада бўлиб ўтади.

Маслаҳатчилар барча ҳужжатларни тайёрлаб бўлганидан кейин Европа етакчилари аввал Украина билан кенг таркибда учрашади, шундан сўнг Трамп ва Европа етакчилари билан бўладиган учрашувга тайёргарлик бошланади. “Биз барчамиз бу учрашувлар январда ўтиши учун жиддий кайфиятдамиз. Кейин, агар ҳаммаси босқичма-босқич кетса, руслар билан ҳам у ёки бу форматда учрашув бўлади. Биз аввал айтилган тегишли форматларга тайёрмиз”, — деб ёзди Зеленский.

Зеленский таъкидлашича, Украинада 20 банддан иборат тинчлик режасини тасдиқлаш учун референдум талаб этилади. Бироқ референдум ўтказиш учун 60 кунлик ўт очишни тўхтатиш (сулҳ) зарур. Украина президентига кўра, Россия бу таклифга рози бўлмаяпти.

“Руслар бизга референдум ўтказиш учун керак бўлганча кунга ўт очишни тўхтатгиси келмаяпти. Бу 60 кун. Бу жуда қийин масала, Россия эса урушни давом эттириш — ракеталар, артиллерия ва ҳоказолар билан босим ўтказишни хоҳлаяпти. Шунинг учун биз бу учун курашяпмиз”, — деб ёзди Зеленский.