Трамп соғлиғи аъло даражада эканини айтди

АҚШ президенти Доналд Трамп шифокорлар ўзининг соғлиғи билан боғлиқ муаммоларни аниқламаганини маълум қилди.

«Ҳозир Оқ уй шифокорлари соғлиғим аъло даражада эканини айтди. Шунингдек, улар кетма-кет учинчи марта когнитив қобилият тестидан «аъло» баҳога ўтганимни айтди. Бу саволларнинг 100 фоизига тўғри жавоб берганимни англатади», деб ёзди у Truth Social ижтимоий тармоғида.

Шунингдек, 79 ёшли Трамп АҚШ президентлиги ва вице-президентлигига номзодларнинг барчаси когнитив қобилият тестларидан мажбурий тарзда ўтиши зарур деб ҳисоблашини таъкидлади.

«Буюк мамлакатимизни аҳмоқ ёки қобилиятсиз одамлар бошқармаслиги керак», деб қўшимча қилди давлат раҳбари.

Ўтган йили Американинг баъзи оммавий ахборот воситалари Трампнинг соғлиғи ёмонлашаётгани ҳақидаги тахминларни эълон қилди. Хусусан, унинг йиғилишларда кўпинча кўзини юмиб ўтиришига эътибор қаратди - бу ташқаридан қараганда президент мудраётганга ўхшарди. Бундан ташқари, журналистлар президентнинг шишган оёқлари ва қўлларидаги крем билан ниқобланган кўкаришларга эътибор қаратди. Шунингдек, бир қатор оммавий ахборот воситалари Трампнинг шифокорлари унинг соғлиғи ҳақида хабар беришда етарлича шаффоф эмаслигини гумон қилди.

Шу билан бирга, бир кун аввал Трамп The Wall Street Journal газетасига берган интервюсида ҳар куни аспирин дозасини шифокорлар тавсия қилганидан кўпроқ қабул қилаётганини айтиб, қўлларида кўкаришлар пайдо бўлишини шу билан изоҳлаган эди. Унинг фикрига кўра, аспириннинг юқори дозаси қонни суюлтиради ва шу туфайли кўп йиллардан буён уни қабул қилади.