Германияда Сурияга депортация ғояси баҳсга сабаб бўлди

ГСДП сиёсатчилари ҳар бир алоҳида ҳолатни ўрганмасдан туриб мажбурий депортация қилиш қонун устуворлиги тамойилига мос келмаслигини таъкидлади.

Германия Социал-демократик партияси (ГСДП) коалициядаги ҳамкори — Христиан-социал иттифоқ (ХСИ)нинг Германиядан Суриядан келган қочқинларнинг кўпчилигини депортация қилиш ҳақидаги талабига қарши чиқди. ГСДПдан Бундестаг депутати Ралф Штегнер эслатишича, Германия ташқи ишлар вазири Йоханн Вадефул Дамашққа ташрифи чоғида “тўлиқ вайрон бўлган ҳудудларга қайтишга йўл қўйиб бўлмаслиги”ни айтган. “Бу, албатта, мажбурий бўлмаслиги керак”, — деди Штегнер 2 январ, жума куни Tagesspiegel газетасига.

“Коалиция ичида жиноятчиларни изчил депортация қилиш ва миграция сиёсатидаги ўзгаришлар бўйича муросалардан ташқари, инсонийликнинг асосий меъёрларига риоя қилиниши шарт”, — деди Штегнер.

Бундестагдаги социал-демократлар фракцияси раиси ўринбосари Соня Айхведе ҳам ХСИ ташаббусини рад этди. “Кўплаб сурияликлар жамиятга яхши интеграциялашган”, — деди у. Айхведе таъкидлашича, коалиция келишувида жиноятчилар ва жамоат хавфсизлигига таҳдид деб ҳисобланадиган шахслар, аслида, Сурияга қайтарилиши кераклиги аниқ белгилаб қўйилган. Унинг фикрича, депортация масаласи ҳар бир ҳолат бўйича, жойлардаги вазиятни ҳисобга олган ҳолда кўриб чиқилиши керак. “Умумий, ҳаммага бир хил қарорлар қонун устуворлиги тамойилига мос келмайди”, — деди у.

Аввалроқ Münchner Merkur газетаси, шунингдек dpa ва AFP агентликлари Бавариядаги Зеон (Seeon) монастирида ХСИ ёпиқ йиғилишига тайёрланган позицион ҳужжатни ўрганиб чиққан. ХСИ депутатлар гуруҳи Германия миграция сиёсатини янада қатъийлаштириш ва суриялик қочқинларнинг кўпчилигини келиб чиққан мамлакатига тезроқ қайтаришни талаб қилмоқда.

Ҳужжатда қайд этилишича, Сурияда фуқаролик уруши тугаганидан кейин Германияда вақтинча яшаш ҳуқуқига эга сурияликларнинг аксар қисми учун ҳимоя беришга асос йўқолади. “Ихтиёрий равишда кетмайдиганлар бўйича имкони борича тезроқ депортация жараёнини бошлаш зарур”, — деб таъкидланади ҳужжатда.

Ҳужжатга кўра, 2026 йилда мунтазам авиарейслар жалб қилинган ҳолда, жумладан Сурия ва Афғонистонга ҳам “кенг кўламли депортация амалиёти” ўтказилиши керак. Шунингдек, Германия бўйлаб “чиқиб кетиш марказлари” ташкил этилиши, Мюнхен аэропортида эса депортациялар учун алоҳида терминал очилиши лозимлиги айтилган.