Трамп ҳар куни юқори дозада аспирин қабул қилишини айтди

АҚШ президенти Доналд Трамп интервюда ҳар куни аспириннинг шифокорлар тавсия қилганидан юқорироқ дозасини қабул қилишини маълум қилди. У буни “қонни суюлтириш” ва юрак-қон томир хавфларини камайтириш билан изоҳлаган.

Фото: REUTERS

Reuters манбасига таянилган хабарларда айтилишича, президент шифокори Шон Барбабелла Трамп 325 мг аспиринни ҳар куни “кардиопрофилактика” мақсадида қабул қилишини билдирган, Трампнинг ўзи эса кичикроқ доза маъқулланишини айтган бўлса-да, кўп йиллардан бери каттароқ дозани танлаётганини қўшимча қилган.

ОАВда келтирилишича, айрим кардиологлар бундай ёндашувни “анъанавий эмас” деб баҳолаб, айниқса ёши катта кишиларда аспиринни мунтазам қабул қилиш қон кетиши хавфини ошириши мумкинлигини эслатган.

Шунингдек, АҚШ Профилактик хизматлар бўйича ишчи гуруҳи (USPSTF) 2022 йилги тавсиясида 60 ёш ва ундан катталар учун юрак-қон томир касалликларини “бирламчи профилактика” мақсадида паст дозали аспиринни қабул қилишни бошлашга қарши чиқади (қон кетиши хавфи сабаб).

Тиббий манбаларга кўра, аспиринни ҳар куни қабул қилиш айрим ҳолларда меъда-ичак йўлларида қон кетишига олиб келиши мумкин. NHS эса узоқ муддат ёки катта дозада қабул қилинса, меъда/ичакда яра пайдо бўлиши эҳтимолини қайд этади.

Эслатма: аспиринни ҳар куни қабул қилиш (ёки дозани ўзгартириш) фақат шифокор билан маслаҳатдан кейин амалга оширилиши керак.