Швейцария Кран-Монтанеда ёнғин қурбонлари хотирасини ёд этди

Швейцариянинг Кран-Монтана тоғ-чанғи курортидаги Le Constellation барида содир бўлган ёнғин оқибатида ҳалок бўлган 40 нафар инсон хотирасига бағишланган расмий мотам маросими сукут сақлаш дақиқаси билан бошланди. Тадбир жума куни, 9 январда Мартинии шаҳрида ўтказилди ва у, шунингдек, қарийб 120 нафар жабрланувчига ҳам бағишланди — уларнинг аксарияти оғир куйиш ва тан жароҳатлари олган.

Бутун Швейцария бўйлаб ҳалок бўлганларни хотирлаб, беш дақиқа давомида черков қўнғироқлари чалинди. Фожиа қурбонларининг кўпчилиги ёшлар бўлган.

Маросимга ёнғин оқибатида фуқаролари ҳалок бўлган ёки жабр кўрган Европа давлатларидан юқори лавозимли сиёсатчилар таклиф этилди. Улар орасида Франция президенти Эммануэл Макрон ва Италия президенти Сержо Маттарелла ҳам бор.

Вале кантони ҳукумати раҳбари Матиас Рейнард ҳалок бўлганларнинг яқинларига мурожаат қилиб, ҳозирги вазиятда қилиниши мумкин бўлган энг кам иш — “бутун жамоа номидан” улардан узр сўраш эканини айтди. У таъкидлашича, фожиа учун ҳуқуқий жавобгарликни ўрганишдан ташқари, маънавий жавобгарликни ҳам зиммага олиш зарур.

Швейцария конфедерацияси президенти Ги Пармелен мотам маросимида сўзга чиқиб, Кран-Монтана фожиасини “ақлга сиғмайдиган” деб атади. Унинг айтишича, “ўзини тартиб-интизом ва ишончлилик таянчи деб ҳисоблайдиган мамлакат” хавфни — ҳар доим заиф нуқталарни қидириб турувчи “ҳамма жойда мавжуд соя”ни олдиндан пайқай олиши керак.

Ташкилотчилар маълум қилишича, мотам тадбирларида тахминан 700 киши, жумладан, 150 атрофида марҳумлар яқинлари иштирок этган. Қурбонлар орасида Германия фуқаролари бўлмаган, аммо 11 нафар жабрланувчи Германия клиникаларида, жумладан Баден-Вюртемберг федерал ерида даволанмоқда. Шу сабаб маросимда Баден-Вюртемберг бош вазири Винфрид Кречман ҳам қатнашган.

Тергов маълумотича, ёнғиннинг эҳтимолий сабаби — байрам пиротехника қурилмасининг учқун чиқариши ва бар шифтидаги пенопласт қопламани ёндириб юбориши бўлган.