Зеленский: Украина тинчликка тўсиқ бўлмаган ва бўлмайди

Украина Россия бошлаган урушни якунлашга тўсиқ эмас, деб баёнот берди Украина президенти Володимир Зеленский. Бу ҳақда у пайшанба куни, 15 январда НАТО бош котиби Марк Рютте билан телефон орқали суҳбатидан сўнг эълон қилинган видеомурожаатида айтди. Шу тариқа Зеленский АҚШ президенти Доналд Трампнинг яқиндаги баёнотига муносабат билдирди.

“Биз Америка билан дипломатик иш ҳақида ҳам гаплашдик — Украина ҳеч қачон тинчликка тўсиқ бўлмаган ва ҳеч қачон бўлмайди”, — деди Зеленский Рютте билан суҳбатини назарда тутар экан.

Бир кун аввал Доналд Трамп Reuters агентлигига берган интервюсида Украина, Россиядан фарқли равишда, “тинчлик келишувига камроқ тайёр” эканини айтган эди. Нега АҚШ раҳбарлигидаги музокаралар тўрт йиллик урушни тугатишга олиб келмагани ҳақидаги саволга Трамп “Зеленский”, деб жавоб берган, аммо тафсилотларни аниқлаштирмаган.

Украина раҳбарининг сўзларига кўра, РФнинг Украинанинг энергетика инфратузилмасига давом этаётган ҳужумлари Москва тинчликни хоҳламаётганини намоён қилади. “Айнан Россия ракеталари, Россия дронлари, учувчисиз аппаратлари ва Россиянинг Украинани йўқ қилишга уриниши — Россия умуман келишувларга қизиқмаслигининг яққол исботидир”, — деди Володимир Зеленский.

РФ президенти матбуот котиби Дмитрий Песков 15 январ куни Доналд Трампнинг фикрига қўшилишини билдирди. “Бу фикрга қўшилиш мумкин, бу ҳақиқатан ҳам шундай. Президент Путин ва Россия томони ўз очиқлигини сақлаб қолмоқда”, — деди у.

2025 йил декабрида Reuters агентлиги манбаларига таяниб хабар беришича, АҚШ разведкаси баҳосига кўра, Россия президенти Владимир Путин омма олдида тинчлик келишуви тузиш истаги ҳақидаги баёнотларига қарамай, ҳали ҳам Украина бутун ҳудуди устидан назорат ўрнатишга интиляпти.

Reuters манбаларига кўра, америкалик разведкачиларнинг хулосалари кўп жиҳатдан Европа махсус хизматларининг баҳолари билан ҳамоҳанг.

Европа сиёсатчилари бир неча бор Россия президенти тинчликка қизиқмаслигини таъкидлаб келган. Хусусан, Германия ташқи ишлар вазири Йоханн Вадефул декабр бошида Путин Украина билан тинчлик музокараларини бошламаслик учун изчил равишда баҳоналар излаётганини айтган эди.