Россиялик генерални ўлдиришда айбланган ўзбекистонлик эркак умрбод қамалди

Москвадаги ҳарбий суд Россия Қуролли кучларининг радиациявий, кимёвий ва биологик ҳимоя қўшинлари бошлиғи генерал-лейтенант Игор Кирилловнинг ўлимига сабаб бўлган терактда айбланган Аҳмаджон Қурбоновни умрбод қамоқ жазосига ҳукм қилди.

Қурбонов жазонинг дастлабки 10 йилини қамоқда, қолган муддатини махсус тартибли колонияда ўташи керак. Шунингдек, унга бир миллион рубл миқдорида жарима солинган. Тергов версиясига кўра, Қурбонов - теракт ижрочиси.

Суд иш бўйича яна уч нафар шахсга нисбатан ҳукм чиқарди. Ботухон Точиев 22 йилга, Рамазон Падиев ва Роберт Сафарян мос равишда 18 ва 25 йилга озодликдан маҳрум этилди.

Қайд этилишича, Қурбонов жиноятдаги айбини тўлиқ тан олган ва қилган ишидан пушаймон бўлган. Сафарян айбини қисман тан олди. Падиев ва Точиев айбни тан олмади.

Игор Кириллов ва унинг ёрдамчиси Иля Поликарпов 2024 йил 17 декабр куни эрталаб генерал яшаган Рязан проспектидаги уй ёнида турган электросамокатга қўйилган бомба портлаши оқибатида ҳалок бўлди. Қурбонов портлашдан бир неча соат ўтиб қўлга олинди. Унга теракт ва ноқонуний қурол савдоси моддалари бўйича айблов эълон қилиниб, тергов изоляторига жўнатилди.

Россия ҳуқуқ-тартибот идоралари версиясига кўра, сўроқ пайтида Қурбонов уни Украина махсус хизматлари ёллаганини, жиноят учун унга 100 минг доллар ва Европа давлатларидан бирига боришни ваъда қилишганини айтган. Точиев ва Падиев, терговнинг таъкидлашича, Қурбонов учун Москва вилоятидаги хостелдан хона ижарага олган. Қурбонов теракт содир этганидан кейин у ерда яшириниши керак эди.