Зеленский: Киевда бир миллиондан ортиқ истеъмолчи электрсиз қолди

Киевда 20 январ ҳолатига кўра, Россия томонидан ўққа тутишлардан кейин бир миллиондан ортиқ истеъмолчи ҳали ҳам электр таъминотисиз қолмоқда. Бу ҳақда Украина президенти Володимир Зеленский Telegram’да хабар қилди. Унинг қўшимча қилишича, Украина пойтахтида 4000 дан зиёд кўп квартирали уй иссиқликсиз қолган.

Зеленский маҳаллий амалдорлардан ноанъанавий таклифлар беришни ва вазиятни барқарорлаштириш учун энергия ишлаб чиқаришни қайта тақсимлаш бўйича бизнес билан мувофиқлашган ҳолда ишлашни талаб қилди. “Эртага мен аниқ, равшан ҳаракатлар ва қарорлар рўйхатини кутаман”, — деди Украина раҳбари.

Киевда ҳаво ҳарорати минус 10°C гача тушган.

Киев мэри Виталий Кличко: “Ҳозир 5635 та кўп қаватли уйдан 4000 таси иссиқликсиз — кеча тунда душман пойтахтга ҳужум қилганидан кейин уларда иссиқлик таъминоти бўлмаган. 1600 дан ортиқ турар жой уйига коммунал хизматлар иссиқликни берди”, — деб аниқлик киритди.

Шаҳар раҳбарининг айтишича, вазият мураккаб: чунки уйларнинг аксарияти 9 январ куни РФнинг муҳим инфратузилмага берган зарбаларидан кейин иккинчи марта қайта уланмоқда.

Кличко шунингдек, Германиянинг халқаро ҳамкорлик жамияти (GIZ) Киевга иккита мини-иссиқлик электр станцияси (мини-ИЭС) етказиб беришини айтди. Имзоланган меморандумга кўра, улар келаси ҳафтада Украина пойтахтига олиб келинади.

Мэр қўшимча қилишича, Киевда электр ва иссиқлик ишлаб чиқарадиган бешта когенерация қурилмаси ўрнатилган. Улардан иккитаси ишга туширилган. Қолган учтаси бўйича ишга тушириш–созлаш ишлари якунига етказилмоқда.

20 январ эрталабки ҳолатга кўра, Киевда ёруғлик, сув ва иссиқлик таъминотидаги узилишлар асосан Днипронинг чап соҳилида қайд этилган. Ижтимоий инфратузилма объектлари автоном озиқлантириш (мустақил электр манбаи) режимига ўтказилган.

РФ Қуролли кучлари 20 январ кечаси Украинага ракета ва дронлардан зарбалар берган. Украина Қуролли кучлари Ҳаво кучлари маълумотларига кўра, бу пайтда 342 та нишон уриб туширилган ёки бостирилган: 315 та дрон, 13 та Х-101 қанотли ракета ва 14 та “Искандер” баллистик ракетаси. Ҳужумнинг асосий йўналиши Киев вилояти бўлган.