Қўшимча функционаллар
-
Тунги кўриниш
Путин “Тинчлик кенгаши”га Россия активларидан 1 млрд доллар беришга тайёр
Ташкилот низомига кўра, давлатлар Тинчлик кенгашида уч йиллик вақтинчалик аъзоликни тўловсиз олиши мумкин. Биринчи йил давомида бадал тўлаганлар учун эса доимий аъзолик кафолатланади.
Фото: Sputnik / Рамиль Ситдиков
Россия Украинага Россия армияси ҳужум қилганидан кейин, жумладан АҚШда ҳам музлатиб қўйилган ўз активларидан 1 миллиард долларни АҚШ президенти Доналд Трамп ташаббуси билан ташкил этилган “Тинчлик кенгаши”га ўтказишга тайёр. Бу ҳақда Россия президенти Владимир Путин чоршанба куни, 21 январда РФ Хавфсизлик кенгаши йиғилишида маълум қилди.
Унинг айтишича, қолган маблағларни “Россия ва Украина ўртасида тинчлик шартномаси тузилгандан кейин, ҳарбий ҳаракатлар давомида зарар кўрган ҳудудларни тиклашга ишлатиш мумкин бўлар эди”. Путин Россиянинг Украинага қарши урушидан вайрон бўлган қайси ҳудудларни назарда тутаётганини — Киев назоратида қолган ҳудудларми ёки Москва томонидан оккупация қилинган ҳудудларми — аниқлаштирмади. Шунингдек, Москва АҚШнинг таклифини қабул қилиб, “Тинчлик кенгаши” аъзоси бўлишга тайёрми-йўқми, бу ҳақда ҳам айтмади.
“Тинчлик кенгаши” деб аталувчи мазкур тузилма дастлаб Ғазо секторда тинчлик йўлга қўйилиши режасини таъминлаш учун тузилган. Бироқ унинг низоми билан танишган кузатувчилар бу орган ваколатлари анча кенг бўлиб чиқиши мумкинлигини қайд этмоқда — шу боис у БМТга рақобатчига айланиб қолиши ҳам эҳтимолдан холи эмас.
Кутилишича, “Тинчлик кенгаши” низоми 22 январ куни Давосдаги Жаҳон иқтисодий форуми (ЖИФ)да имзоланади. “Кенгаш” раиси Доналд Трамп бўлади. Унинг ижро қўмитасига, бошқалар қаторида, АҚШ давлат котиби Марко Рубио, Америка президентининг куёви Жаред Кушнер ва Британия собиқ бош вазири Тони Блэр киради. “Тинчлик кенгаши” ишида қатнашиш учун таклифномалар, жумладан, Германия ва Россия раҳбарларига ҳам юборилган.
Германия ҳукуматида Трампнинг “Тинчлик кенгаши”да иштирок этиш истиқболи шубҳа билан қабул қилинди. “Қўшимча халқаро институтларга эҳтиёж йўқ. Бизда БМТ бор, янги органлар тузиш ўрнига уни кучайтириш керак”, — деди ГФР вице-канцлери Ларс Клингбайл 21 январ куни.
Бундан олдин, шунингдек 21 январда Владимир Путин РФ Хавфсизлик кенгашининг доимий аъзолари билан бўлган йиғилишда Россия ТИВга келиб тушган ҳужжатларни ўрганиш ва бу масала юзасидан стратегик ҳамкорлар билан маслаҳатлашиш топширилганини айтган эди. “Фақат шундан кейингина бизга етказилган таклифга жавоб бера оламиз”, — дея Россия давлат раҳбаридан иқтибос келтирди “Интерфакс” агентлиги.
Маълумотларга кўра, АҚШ “Тинчлик кенгаши”да иштирок этиш учун жами тахминан 50 нафар жаҳон етакчисига таклифнома юборган. ОАВ хабарларига кўра, 21 январга қадар Аргентина, Озарбойжон, Арманистон, Беларус, Венгрия, Қозоғистон, Марокаш, БАА, Ветнам ва айрим бошқа давлатлар розилик билдирган.
1 миллиард доллар — “Тинчлик кенгаши”да доимий аъзоликка эга бўлишни истаган давлатлар бир йил давомида йўналтириши керак бўлган бадал ҳисобланади.
