ФИФА собиқ раҳбари Блаттер жаҳон чемпионатини бойкот қилишга чақирди

ФИФА собиқ раҳбари Зепп Блаттер АҚШ президенти Доналд Трамп ва унинг маъмуриятининг мамлакат ичидаги ва хориждаги хатти-ҳаракатлари туфайли мухлисларнинг 2026 йилда АҚШда бўлиб ўтадиган футбол бўйича жаҳон чемпионати ўйинларини бойкот қилиш таклифини қўллаб-қувватлади.

Блаттер жаҳон чемпионати учун АҚШ мезбон мамлакат сифатида муносиблигини шубҳа остига қўйди ва ижтимоий тармоқдаги постида турнирни бойкот қилишга чақирди.

АҚШ Канада ва Мексика билан биргаликда 11 июндан 19 июлга қадар футбол бўйича жаҳон чемпионатига мезбонлик қилади.

Блаттер иқтисодий жиноятлар ва коррупцияга қарши кураш бўйича швейцариялик ҳуқуқшунос Марк Питнинг футбол мухлисларини АҚШдан узоқроқ бўлишга чақирган фикрларини қўллаб-қувватлади.

«Агар биз муҳокама қилган нарсаларнинг барчасини ҳисобга олсак, мухлислар учун фақат битта маслаҳат бор: АҚШдан узоқроқ юринг!», деди ўн йил олдин ФИФА Ислоҳотларни назорат қилиш мустақил қўмитасига ҳам раҳбарлик қилган Пит ўтган ҳафта Швейцариянинг Der Bund газетасига берган интервюсида.

«Нима бўлганда ҳам, телевизорда бу яхшироқ кўринади. Боргандан кейин эса мухлислар агар расмийларнинг талабларини қондира олмаса, дарҳол уйга энг яқин рейсга ўтқазишларига тайёр бўлиши керак. Агар омади келса», деди Пит.

Ижтимоий тармоқдаги постида Блаттер Питдан иқтибос келтириб, қўшимча қилди: «Менимча, Марк Пит бу жаҳон чемпионатини шубҳа остига қўйганида ҳақ».

89 ёшли сиёсатчи 1998 йилдан 2015 йилгача ФИФА президенти лавозимида ишлаган, шундан сўнг, коррупция бўйича тергов туфайли истеъфога чиққан.

Халқаро футбол ҳамжамиятининг АҚШга нисбатан хавотирлари Трампнинг Гренландияга нисбатан экспансионистик позицияси, саёҳат тақиқлари ва АҚШ шаҳарларида, айниқса Миннеаполисда иммиграция қонунчилигининг кучайтирилишига қарши чиқаётган мигрантлар ва намойишчиларга нисбатан тажовузкор тактикаси билан боғлиқ.

Икки ҳафта олдин, Трамп маъмурияти Сенегал ва Кот-д'Ивуар фуқароларига мамлакатга визасиз киришни тақиқлади. Шунингдек, жаҳон чемпионатига йўлланма олган яна икки давлат – Эрон ва Ҳаити мухлисларига ҳам АҚШга кириш тақиқланган эди.

Таъкидлаш жоиз, жаҳон чемпионатини бойкот қилишга чақириқлар ҳали бирор марта расмий даражада янграмади. Бундай чақириқлар алоҳида, норасмий шахсларга тегишли бўлиб қолмоқда.