ICE'га қарши норозиликлар: АҚШда икки журналист ҳибсга олинди

Дон Лемон — CNN телеканали собиқ бошловчиси ва мустақил журналист Жоржия Форт АҚШ Иммиграция ва божхона хизмати (ICE)га қарши норозилик акциялари ҳақидаги репортажлар билан боғлиқ равишда Миннесотада ҳибсга олинди, уларга оғир жиноятларни содир этганлик айблови қўйилган. Бу ҳақда Журналистлар ҳимояси бўйича қўмита жума куни, 30 январда хабар қилди.

Қўмита баёнотида, бу қарор “АҚШда матбуотга қарши ҳужумларнинг жиддий эскалацияси”дан далолат бериши айтилган.

АҚШ Конгресси Вакиллар палатасидаги демократик озчилик раҳбари Хаким Жеффрис эса Доналд Трампни ҳуқуқни муҳофаза қилувчи органларни “журналистларга қарши қурол” сифатида ишлатаётганликда айблади.

АҚШ адлия вазири — бош прокурор Пэм Бонди ҳибсларни шундай изоҳлади: гўёки Лемон ва бошқа фаоллар 18 январ куни Миннесотадаги бир черковга “мувофиқлаштирилган ҳужум” қилган.

Доналд Трамп эса аввалроқ, маҳаллий Иммиграция ва божхона хизмати бўлимига раҳбарлик қиладиган руҳоний хизмат қиладиган ибодатхонадаги хизмат гўёки профессионал қўзғатувчилар ва исёнчилар томонидан бузилган, деган фикрни билдирган. Видеоёзувларда намойишчилар черков ичида “ICE, кетинглар!” деб бақираётгани кўринади.

Шу орада, АҚШ Адлия вазирлиги Алекс Преттининг Миннеаполисда ҳалок бўлиш ҳолатлари юзасидан тергов бошлади. Адлия вазири ўринбосари Тодд Бланш матбуот анжуманида вазирликнинг фуқаролик ҳуқуқлари бўлими Федерал тергов бюроси билан бирга федерал хизматчилар фуқаролик ҳуқуқларини бузган-бузмаганини текшираётганини тасдиқлади. Улар АҚШ фуқароларини куч ишлатишнинг мутаносиб бўлмаган қўлланишидан ҳимоя қилади.

30 январ куни Миннеаполисда ICE ҳаракатларига қарши яна кўп минг кишилик норозилик акцияси ўтказилди. Унда, жумладан, машҳур рок хонанда Брюс Спрингстин ҳам қатнашиб, Streets of Minneapolis (“Миннеаполис кўчалари”) номли янги қўшиғини ижро этган. У қўшиқ федерал агентлар қўлидан икки америкалик фуқаро ҳалок бўлганидан кейин ёзилгани айтилмоқда.

37 ёшли, ветеранлар учун мўлжалланган шифохонанинг реанимация (интенсив терапия) бўлимида ишлаган Алекс Претти 24 январ куни Миннеаполис четида мигрантларни депортация қилиш учун ушлаш рейди вақтида ҳалок бўлган.

АҚШ Ички хавфсизлик вазирлиги аввал бошда Претти қуролланган бўлгани, агентлар эса “ўзини ҳимоя қилиш мақсадида” ўқ узганини билдирган. Бироқ гувоҳлар, маҳаллий амалдорлар ва қурбоннинг оиласи бу версияга эътироз билдириб, унинг қўлида қурол эмас, телефон бўлганини айтган. Ҳодиса жойидан олинган видеокадрлар ҳам Претти қаршилик кўрсатмаганини ва ўқ узилган пайтда ерда ётганини кўрсатади.

Преттининг ўлдирилиши ортидан пайдо бўлган қаттиқ норозилик тўлқинидан кейин Доналд Трамп воқеа юзасидан “ҳалол ва муносиб тергов” ўтказилишини эълон қилди. АҚШ Конгресси аллақачон ҳодиса бўйича дастлабки ички тергов якунларига доир ҳисоботни олган. Унда Претти ушлаш пайтида қуролга қўл узатгани ҳақида ҳеч қандай қайд йўқ — бу эса Трамп маъмуриятининг дастлабки баёнотларига зид.

Миннесотага Трамп маъмурияти бошлаган “иммиграция қонунчилигига риоя этилишини кучайтириш” сиёсати доирасида минглаб федерал ходимлар юборилган. Улар мигрантларга қарши қаттиқ рейдлар ўтказмоқда.

Преттининг ўлими Миннеаполисда ICE агенти томонидан 37 ёшли Рене Гуд ўлдирилганидан кейинги уч ҳафтага ҳам етмай содир бўлган. Трамп маъмурияти Гудни “ички террорист” деб атаган ва уни ўққа тутган ICE ходими гўёки ўзини ҳимоя қилиш тартибида ҳаракат қилган, чунки у гўёки “машина билан босиб кетиш”га уринган, деб иддао қилган.

Миннеаполис аҳолиси антимигрант рейдларига қарши чиқмоқда: кўнгилли кузатувчилар қўшниларни ICE пайдо бўлгани ҳақида огоҳлантира бошлаган, уйдан чиқишдан қўрқаётган мигрант оилаларига озиқ-овқат етказиб бериш йўлга қўйилган, йирик норозилик акциялари ўтказилмоқда.