АҚШ 48 соат ичида Эронга зарба беради - Вучич

Сербия президентининг фикрича, Жеффри Эпштейн иши бўйича янги ҳужжатларнинг эълон қилиниши АҚШнинг Эронга ҳужумини тезлаштиради.

Фото: Filip Stevanovic/Anadolu/Getty Images/File

Қўшма Штатлар 48 соат ичида Эронга зарба беради, деди Сербия президенти Александр Вучич Pink TV телеканали эфирида.

Унинг фикрича, «Эронга ҳужум муқаррар».

«Яқин 48 соат ичида Эронга ҳужум қилиниши ва бошқа йирик воқеалар юз беришини кутяпман», — деди у.

Вучичнинг сўзларига кўра, Жеффри Эпштейн иши бўйича янги ҳужжатларнинг эълон қилиниши АҚШнинг Эронга ҳужумини тезлаштиради. У бу вазиятни Моника Левински билан боғлиқ можарога солиштирди.

«Моника Левински билан бўлгани сингари бундай бемаъни ҳужжатлар пайдо бўлганида кимгадир ҳужум қилинади. Эпштейн файллари бу ҳужумни тезлаштирадими? Бунга деярли ишончим комил», — деб таъкидлади Вучич.

Моника Левински 1998 йилда АҚШнинг 42-президенти Билл Клинтон билан ишқий муносабатлари туфайли можаро марказида қолган эди. Клинтоннинг Левински билан муносабатлари ҳақида қасамёд остида берган кўрсатмалари президентни ёлғон гувоҳликда айблашга ва Клинтонга нисбатан импичмент жараёни бошланишига сабаб бўлган, аммо конгрессменларнинг етарли қисми бу ташаббусни қўллаб-қувватламаганди.

Эпштейн 2019 йилда вояга етмаганлар савдосида айбланиб ҳибсга олинган ва ўша йилнинг августида қамоқхонада ўз жонига қасд қилганди. 2026 йилда ошкор этилган Эпштейн ҳужжатларида, жумладан, АҚШ президенти Доналд Трампнинг исми ҳам қайд этилган.

АҚШ президенти 28 январ куни Abraham Lincoln авиаташувчиси бошчилигидаги «улкан армада» Эрон томон йўл олганини маълум қилди.

Эроннинг олий раҳнамоси Али Хоманаий агар АҚШ Эронга ҳужум қилса, можаро минтақавий тус олишини айтди.