Ҳиндистон заводлари АҚШ билан келишув учун Россия нефтидан воз кечмоқда

Ҳиндистондаги нефтни қайта ишлаш компаниялари апрел ойида етказиб бериш шартлари билан Россия нефтини сотиб олишдан воз кечмоқда ва унга оид битимлардан узоқроқ давр мобайнида тийилишни режалаштирмоқда. Reuters якшанба куни, 8 февралда манбаларга таяниб шундай хабар берди. Бу, ўз навбатида, Ню-Деҳлининг АҚШ билан савдо келишувига келишишига ёрдам бериши мумкин.

“Indian Oil, Bharat Petroleum ва Reliance Industries трейдерларнинг март ва апрел ойларида Россия нефтини юклаш бўйича таклифларини қабул қилмаяпти”, — деб келтиради журналистлар ушбу компанияларга мурожаат қилган трейдернинг сўзларини. “Бошқа нефтни қайта ишлаш компанияларининг аксарияти ҳам Россия нефтини харид қилишни тўхтатган”, — деб давом этган Reuters.

Ҳиндистон Ташқи ишлар вазирлиги вакили журналистлар сўровига жавобан шундай деди: “Энергия манбаларимизни объектив бозор шароитлари ва ўзгариб бораётган халқаро динамикага мувофиқ диверсификация қилиш — энергия хавфсизлигини таъминлаш стратегиямиз асосидир”.

Бу жараёнлар АҚШ ва Ҳиндистон савдо келишувини тузишга яқинлашаётган бир пайтда кечмоқда. Томонлар март ойига қадар тузишни режалаштираётган битим доиралари ҳақида эълон қилди. У, хусусан, савдо божларини камайтириш ва икки мамлакат ўртасидаги иқтисодий ҳамкорликни чуқурлаштиришни назарда тутади.

Бир кун олдин маълум бўлишича, АҚШ президенти Доналд Трамп Ҳиндистондан экспорт қилинадиган маҳсулотларга 25 фоизлик бож тўловларини бекор қилган. Бу божлар Ню-Деҳлининг Россиядан нефт харид қилиши билан асосланган эди. AFP агентлиги эълон қилган фармон матнига кўра, Ҳиндистон бундай харидларни тўхтатиш мажбуриятини олган.

Аввалроқ Трамп Вашингтон ва Ню-Деҳли келишув тузишини айтган эди. Унинг доирасида Ҳиндистон АҚШдан ва “эҳтимол” Венесуэладан нефт сотиб олишни бошлайди.