АҚШ Тинч океанида наркосавдогарларга тегишли деб айтилган кемага зарба берди

Тинч океаннинг шарқий қисмида “наркотрафикнинг маълум йўналишлари бўйлаб ҳаракатланган” ва наркосавдога жалб этилган кемага зарба берилди, натижада икки киши ҳалок бўлди, деб хабар қилди АҚШ Қуролли кучларининг Жанубий қўмондонлиги.

Фото: US Southern Command/AFP

АҚШ қуролли кучлари Тинч океанида наркотик ташиган навбатдаги кемага зарба берилганини маълум қилди. Душанба, 9 феврал куни амалга оширилган ҳужум натижасида наркосавдода гумон қилинаётган икки киши ҳалок бўлган, деб хабар берди АҚШнинг Лотин Америкаси ва Кариб ҳавзаси бўйича Жанубий қўмондонлиги X ижтимоий тармоғида.

Қўмондонлик постида шундай дейилади: “Разведка маълумотлари кеманинг Тинч океаннинг шарқий қисмида наркотрафикнинг маълум йўналишлари бўйлаб ҳаракатланганини ва наркосавдо операцияларида иштирок этганини тасдиқлади. Зарба натижасида икки ‘наркотеррорист’ ўлдирилди, бири тирик қолди”.

Қўмондонлик, шунингдек, тирик қолган шахсни қутқариш зарурати ҳақида “зудлик билан АҚШ қирғоқни қўриқлаш хизматига хабар берилгани”ни қайд этган.

Бу шунга ўхшаш учинчи зарба. Қўмондонлик баёнотига кўра, 3 январ куни АҚШ қуролли кучлари ҳарбий амалиёт давомида Венесуэла раҳбари Николас Мадурони қўлга олган ва уни турмуш ўртоғи Силия Флорес билан бирга АҚШга олиб кетган. Уларга қўйилган айбловлар орасида “наркотерроризм мақсадида тил бириктириш” ва “кокаин олиб кириш мақсадида тил бириктириш” ҳам бор. Улар айбини тан олмади.

Қўмондонлик маълум қилишича, 2025 йил сентябридан бери АҚШ Қуролли кучлари Тинч океани ва Кариб ҳавзасида наркотик контрабандасига алоқадор деб гумон қилинган ўнлаб кемаларга ҳужум қилган. Ҳарбийлар маълумотига кўра, бу ҳужумлар оқибатида камида 130 киши ҳалок бўлган.

АҚШ президенти Доналд Трамп маъмурияти ҳалок бўлганлар ҳақиқатан ҳам наркосавдогар бўлганини тасдиқлайдиган далилларни тақдим этмаган. Танқидчилар эса бу ҳужумларни судсиз қатл деб атаб, халқаро ҳуқуқ бузилаётганини таъкидлайди.