Украина: Германия Россияни тинчлик музокараларида муросага чақирмоқда

Германия ўтган ҳафта Абу-Дабида бўлиб ўтган музокараларда “анча катта илгарилаш”ни кўришни истаган, деди душанба, 9 феврал куни Берлинда Германия ҳукумати расмий вакили Штефан Корнелиус. “Москва ҳали-ҳамон максималистик талабларда турибди. Биз Москвани бу талаблардан воз кечишга ва қабул қилинадиган муросаларга олиб борадиган йўлларни излашга чақиряпмиз”, — деб таъкидлади у.

Украинадаги урушни якунлашнинг эҳтимолий шартлари бўйича ёпиқ тарзда ўтган икки кунлик музокаралар 5 феврал куни Абу-Дабида якунланган. Унда Киев ва Москва навбатдаги асирлар алмашинуви бўйича келишиб олган. Бироқ Украинада ўт очишни тўхтатиш сари йўлда жиддий бурилишга эришилмаган.

Шунга қарамай, ушбу учрашувлар якунлари бўйича барча томонлар — яъни Россия, Украина ва АҚШ муайян илгарилаш борлигини билдирган. Масалан, АҚШ давлат котиби Марко Рубио ҳал қилинмаган масалалар рўйхати “сезиларли даражада қисқаргани”ни, бироқ уларнинг “энг қийинлари” ҳали қолганини айтган. Хусусан, РФ армияси томонидан эгаллаб олинган Украина ҳудудларининг келажаги масаласи ҳануз аниқ эмас.

Ўз навбатида, Украина президенти Володимир Зеленский 7 феврал куни журналистлар билан учрашувда Вашингтон Киев ва Москва музокарачиларига 9 февралдан бошланадиган ҳафтада Майамида янги музокаралар раундини ўтказишни таклиф қилганини маълум қилди. Давлат раҳбарининг қўшимча қилишича, Украина ўз иштирокини тасдиқлаган.

Германия ҳукумати матбуот котиби Штефан Корнелиус музокара жараёнининг давом этишини қўллаб-қувватлаган. “Муҳими шундаки, Украина Россия билан тўғридан тўғри музокара олиб бормоқда, — деди у 9 феврал куни. — Бу тинчлик жараёнига қараб олға силжиш учун марказий элементдир”.