Юк кўтариш қурилмаларини техник кўрикдан ўтказиш тартиби тасдиқланди

Вазирлар Маҳкамаси қарори билан “Юк кўтариш қурилмаларини техник кўрикдан ўтказиш тартиби тўғрисида”ги низом тасдиқланиб, соҳада ваколатли давлат органи ва техник кўрикларни ўтказиш муддатлари белгиланди.

Фото: Kun.uz

Вазирлар Маҳкамасининг 2026 йил 11 февралдаги 53-сон қарори билан “Юк кўтариш қурилмаларини техник кўрикдан ўтказиш тартиби тўғрисида”ги низом тасдиқланди. Ҳужжат 2026 йил 12 майдан кучга киради.

Низомга кўра, Вазирлар Маҳкамаси ҳузуридаги Саноат, радиация ва ядро хавфсизлиги қўмитаси мазкур соҳада ваколатли давлат органи этиб белгиланди.

Қайд этилишича, янги ўрнатилган, модернизация (реконструкция) қилинган ёки мукаммал таъмирланган юк кўтариш қурилмалари фойдаланишга топширилгунга қадар тўлиқ техник кўрикдан ўтказилиши шарт.

Шунингдек, фойдаланишда бўлган юк кўтариш қурилмалари камида йилига 1 марта — қисман техник кўрикдан, 3 йилда 1 марта — тўлиқ техник кўрикдан ўтказилиши керак.

Техник кўриклар мулкдорнинг ёзма ёки электрон мурожаати асосида, мулкдор билан тузилган шартномага мувофиқ, ихтисослашган ташкилот томонидан ўтказилиши белгиланган. Низомда техник кўриклар дастлабки, даврий ва навбатдан ташқари турларга ажратилади.