Украина, Россия ва АҚШ музокараларининг янги раунди Женевада ўтади

Украина президенти офисида Россия, Украина ва АҚШ делегацияларининг Россия бошлаган урушни якунлаш бўйича янги музокаралар раунди 17–18 феврал кунлари Женевада бўлиб ўтиши тасдиқланди. Бу ҳақда жума куни, 13 февралда Украина ОАВ Володимир Зеленскийнинг коммуникациялар бўйича маслаҳатчиси Дмитрий Литвинга таяниб хабар қилди. Унинг айтишича, Украина делегацияси бўлажак уч томонлама учрашувга тайёргарлик кўряпти.

Аввалроқ Женевадаги музокаралар ҳақида Владимир Путин матбуот котиби Дмитрий Песков маълум қилган эди. У, шунингдек, Россия делегациясига РФ президенти ёрдамчиси Владимир Мединский раҳбарлик қилишини қўшимча қилган.

Politico маълумотига кўра, АҚШ томони янги музокаралар раундида муайян илгарилаш бўлишига умид қилмоқда. Бироқ асосий тўсиқ ҳали ҳам ҳудудлар масаласи бўлиб қолмоқда: Россия бутун Донбассни назорат қилиш даъвосини илгари сурмоқда, жумладан РФ қўшинлари эгаллай олмаган ерлар ҳам шунга киради. Нашрга исмини ошкор қилмасликни сўраган юқори мартабали америкалик амалдор шундай деган: “Икки томон ҳам ўз позицияларида анча қаттиқ туриб олган, лекин, менимча, ҳамма олдинга йўл борлигини ҳис қиляпти”.

Унинг сўзларига кўра, АҚШ Украинага шундан дарак берган: Москва ва Киев урушни тугатиш бўйича умумий келишувга келмагунча, АҚШ хавфсизлик кафолатлари ҳақидаги келишувни имзоламайди. Аввалроқ Украина президенти Володимир Зеленский журналистлар билан учрашувда АҚШ урушни ёз бошланишидан олдин якунлашга умид қилаётганини айтган, чунки июн ойидан кейин АҚШ учун бошқа устувор масала — Конгресс сайловлари — пайдо бўлади.

Bloomberg агентлиги ҳам янги раунд доирасида томонлар “мураккаб ҳудуд масаласи”га эътибор қаратиши ва АҚШнинг Донбассда буфер сифатида “эркин иқтисодий зона” ташкил этиш таклифини муҳокама қилиши мумкинлигини тахмин қилган. Украина президентининг айтишича, урушдаги ҳар икки томон ҳам бу америкаликлар ғоясини шубҳа билан қабул қилмоқда. “Бу борада қарашларимиз турлича. Ва қуйидагига келишдик: келаси учрашувга бу қандай кўриниш олиши мумкинлиги ҳақида ўз тасаввуримиз билан қайтайлик”, — деди Зеленский Bloomberg агентлигига.

Украина, Россия ва АҚШ Абу-Дабида ёпиқ тарзда икки раунд музокара ўтказган. Биринчиси 23–24 январ, иккинчиси 4–5 феврал кунлари бўлиб ўтган. 5 феврал куни Киев ва Москва навбатдаги асирлар алмашинуви бўйича келишиб олган. Томонлар “илгарилаш бор” деган баёнотлар берганига қарамай, Россиянинг Украинага қарши урушига чек қўйиш йўлида яна бир бор жиддий бурилишга эришилмаган.