Франция Grinch танкерини жарима тўланганидан кейин қўйиб юборди

Франция ҳокимияти ушлаб турилган нефт танкери Grinch’ни кеманинг эгаси бўлган компания “бир неча миллион евро” миқдоридаги жаримани тўлаганидан сўнг озод қилди. Бу ҳақда сешанба, 17 феврал куни Франция ташқи ишлар вазири Жан-Ноэл Барро маълум қилди. Бундан олдин Франция президенти Эммануэл Макрон Володимир Зеленский билан суҳбатда, Франция қонунчилиги талаблари сабабли РФнинг “соя флоти”га мансуб ушлаб турилган танкер қўйиб юборилишини билдирган эди.

«Европа санкцияларини четлаб ўтишнинг ҳам ўз нархи бор. Россия бундан буён соҳилларимиз ёнидаги “соя флоти” орқали урушини жазосиз молиялаштира олмайди. Нефт танкери Grinch бир неча миллион евро тўлангани ва Фос-сюр-Мерда уч ҳафта давом этган қимматга тушган ҳаракатсиз ҳолатда ушлаб турилганидан кейин Франция сувларини тарк этади. Давом этамиз», — деб ёзди Барро.

Grinch нефт танкери 22 январь куни Ўрта Ер денгизида тўхтатиб қолинганидан кейин, Эммануэл Макрон операция вақтида Францияни бир нечта иттифоқчилар, жумладан Буюк Британия қўллаб-қувватлаганини айтган. У шунингдек, кема халқаро санкциялар остида эканини ва, тахминларга кўра, сохта байроқ остида юрганини қайд этган.

Орадан олти кун ўтиб, Марсел прокуратураси баёнотига кўра, Франция ҳокимияти Россиянинг “соя флоти”га дахлдорликда гумон қилинган ушбу танкерга нисбатан маъмурий ҳибс жорий этган. Танкер капитани — 58 ёшли Ҳиндистон фуқароси аввал Франция ҳокимияти томонидан қўлга олинган, бироқ бир муддатдан сўнг озод қилиниб, кемага қайтган.

Франциянинг BFMTV телеканали хабар қилишича, Grinch танкери Мурманскдан Комор оролларининг сохта байроғи остида йўл олган. Ушланганидан кейин кема Марсел–Фос портига йўналтирилган. BFMTV яна таъкидлашича, Grinch Буюк Британиянинг санкциялар рўйхатига киритилган ҳамда ЕИ ва АҚШ санкциялари остида, аммо уларнинг “қора рўйхати”да бошқа номлар билан қайд этилган. Кема асосан нефт маҳсулотларини Хитой ва Ҳиндистонга экспорт қилиш билан шуғулланади.

13–15 феврал кунлари бўлиб ўтган Мюнхен хавфсизлик конференцияси (MSC) доирасида Россиянинг “соя флоти” кемаларини куч ишлатиб мусодара қилиш имконияти муҳокама қилинди. Bloomberg агентлигига кўра, бу баҳсда Буюк Британия, Болтиқбўйи ва Шимолий Европа давлатлари вакиллари иштирок этган.

Эстония мудофаа вазири Ханно Певкур Bloomberg’га берган интервюсида якуний қарор учун қўшимча муҳокамалар зарурлигини айтган. Эстония ташқи ишлар вазири Маргус Цахкна эса айрим НАТО аъзолари “кескинлашувдан қўрқиш” сабаб эҳтиёткорликни сақлаб қолаётганини тушунтирган.

РФнинг “соя флоти” ғарб санкцияларини четлаб ўтиш учун қалбаки байроқлардан фойдаланадиган тахминан 1500 та танкердан иборат. Улардан 600 дан ортиғи аллақачон ЕИ, Буюк Британия ва АҚШ чекловлари остига тушган.

Буюк Британия 7 январ куни АҚШга Кариб денгизидан чиққанидан сўнг қувиб бориш натижасида Россия байроғи остида юрган Marinera танкерини ушлаб олишда ёрдам берган. Франция ҳарбий-денгиз кучлари денгизчилари 22 январ куни Россиядан Ўрта Ер денгизига йўл олган нефт танкерига чиққан. Bloomberg таҳлилчиларига кўра, мувофиқлаштирилган ҳаракатлар Россия нефтини Осиёга экспорт қилишдаги “осон йўл”ни тўсиб қўйиши мумкин.