Олимпиада очилишида Украина жамоасига россиялик кўнгилли ҳамроҳлик қилди

Россиялик Анастасия Кучерова Миландаги “Сан-Сиро” стадионида бўлиб ўтган қишки Олимпия ўйинлари очилиш маросимида Украина терма жамоаси табличкасини кўтариб чиққан. Бу ҳақда қиз Instagram саҳифасида айтиб ўтган. Associated Press (AP) агентлигига берган интервюсида Кучерова Украина спортчиларини кузатиб боришга қарор қилганини таъкидлади.

«Бу одамларнинг ёнида юриб борар экансан, улар ҳар қандай россияликни ёмон кўришга тўла ҳақли эканини тушунасан. Шунга қарамай, менимча, уларга, эҳтимол, ҳамма одамлар ҳам бир хил ўйламаслигини кўрсатиш учун ҳеч бўлмаганда кичик қадам ташлаш муҳим», — деди қиз.

AP аниқлашича, Анастасия Кучерова 2018 йилдан бери Россияга бормаган ва 14 йилдан буён Миланда яшайди, у ерда архитектор бўлиб ишлайди. Украина жамоаси табличкасини кўтариб чиқишни у ўзи таклиф қилган. Дастлаб мамлакатларни тақсимлаш тасодифий бўлиши керак эди, аммо кейин хореограф кўнгиллилардан кимнинг қайси давлат бўйича хоҳиши бор-йўқлигини сўраган, шунда РФда туғилган қиз Украинани танлаган.

Узун кумушранг пуховикка ўраниб олган қиз ортидан беш нафар украин спортчиси юриб борган — улар орасида конкичи Елизавета Сидорко ва фигурист Кирилл Марсак ҳам бўлган. Ҳар икки спортчининг отаси ҳозир фронтда.

AP билан суҳбатда Анастасия айтишича, чиқишдан олдин спортчилар унинг рус эканини пайқаган ва унга рус тилида мурожаат қилган. Кучерованинг сўзларига кўра, руслар ва украинлар ўртасидаги «чуқур боғлиқлик» аломати бўлган, «у, албатта, уруш бўлмаганда сақланиб қолиши ҳам мумкин эди».

«Мен орқага ўгирилдим — уларга нима дейишимни билмасдим, — аммо шунчаки бутун стадион уларни тик турган ҳолда олқишлашини айтдим», — дейди у. Томошабинлар жамоани қўллаб-қувватловчи қичқириқлар билан қарши олганида, қиз йиғлаб юборган, кўнгиллилар либосининг бир қисми бўлган катта қора кўзойнак ортида кўз ёшларини яширган.

Кучерова ўз сўзлари РФда қолган танишларига зарар етказиши эҳтимоли борлигини тушунишини ҳам таъкидлаган. «Мен бу ҳақда қайғуришим керак ва бу нарсадан қўрқишим керак. Лекин менимча, агар мен — демократик давлатда яшаб, барча эркинликлардан фойдаланиб турган инсон қўрқсам, демак, режим ғалаба қилган бўлади», — деди у AP'га берган интервюсида.