Беларус “Тинчлик кенгаши” йиғилиши учун визани ололмади

Беларус делегацияси АҚШ президенти Доналд Трампнинг 19 февралда бўлиб ўтган “Тинчлик кенгаши” инаугурацион йиғилишида қатнашиш учун визаларни ололмади. Бу ҳақда Беларус ТИВ матбуот хизмати хабар қилди.

“Барча зарур хабарномалар Америка протокол хизматларига белгиланган тартибда юборилди, визаларни расмийлаштириш учун ҳужжатлар олдиндан топширилди. Бироқ, бизнинг томондан барча талаб этиладиган тартиб-таомиллар бажарилганига қарамасдан, Беларус делегациясига визалар берилмади”, — дейилади идора баёнотида.

Минск номидан ташқи ишлар вазири Максим Риженков иштирок этиши керак эди.

Ташқи сиёсат идорасида эслатилишича, дастлаб йиғилишда қатнашиш таклифи Беларус раҳбари Александр Лукашенкога юборилган.

“Тинчлик кенгаши” йиғилиши Вашингтонда бўлиб ўтди, унда 47 давлат вакиллари иштирок этди.

“Тинчлик кенгаши” Трамп ташаббуси билан ташкил этилган бўлиб, 22 январ куни Давосдаги Бутунжаҳон иқтисодий форумида расман таъсис этилган. Ғарбнинг қатор давлатлари мазкур орган ташкил этилишига шубҳа билан қаради, чунки уни БМТга рақобатчи бўлиши мумкин деб ҳисоблади.