Беларусда сиёсий маҳбуслар Статкевич ва Левая озод қилинди

Беларуслик сиёсий маҳбуслар Николай Статкевич ва Наталя Леваянинг озод қилингани ҳақида “Вясна” ҳуқуқни ҳимоя қилиш маркази хабар қилди. Статкевич инсулт ўтказган, Левая эса ҳомиладорликнинг кечки босқичида.

Николай Статкевич Фото: AP

Беларуслик мухолифатчи сиёсатчи Николай Статкевич қамоқдан озод қилинди ва уйида, деб хабар қилди “Вясна” ҳуқуқни ҳимоя қилиш маркази 19 феврал, пайшанба куни. Бу маълумот сиёсатчининг рафиқаси Марина Адамович сўзларига таянилган ҳолда берилган. Унинг айтишича, колонияда бўлган вақтида Статкевич инсулт ўтказган. Ҳозир у нутқ билан боғлиқ муаммоларни ҳис қиляпти, бироқ умумий аҳволи барқарор, деб баҳоланмоқда.

Николай Статкевич — Беларус мухолифатининг энг таниқли вакилларидан бири, 1990-йиллардан бери сиёсий фаол. 2010 йилги президент сайловларидан кейин у норозилик намойишларини ташкил этгани учун колонияда 6 йилга ҳукм қилинган, 2015 йилда эса муддатидан олдин озод этилган. 2020 йил май ойида, Беларусдаги навбатдаги президент сайловлари арафасида, сиёсатчи яна қўлга олинди, 2021 йил декабр ойида эса “оммавий тартибсизликлар”ни ташкил этганлик айби билан 14 йилга озодликдан маҳрум қилиш жазосига ҳукм қилинди. У қамоқда қарийб 6 йил ўтирган.

2025 йил сентябр ойида Беларусь ҳокимияти 52 нафар сиёсий маҳбусдан иборат гуруҳни озод қилиб, уларни Литвага олиб чиққан. Бироқ Николай Статкевич мамлакатни тарк этишдан бош тортган. У Литва билан чегарадаги нейтрал ҳудудда бир неча соат турган, кейин эса Беларусга қайтарилган. Кейинроқ Александр Лукашенко Статкевични “қайта олиб келишгани”ни айтган. ОАВ маълумотларига кўра, шундан кейин Статкевични яна Витебск вилоятидаги колонияга юборишган. Узоқ вақт давомида унинг қаерда экани ҳатто оиласига ҳам маълум бўлмаган.

Шунингдек, 9 ойлик ҳомиласи бўлган сиёсий маҳбус Наталя Леваянинг ҳам озод қилингани маълум бўлди. Александр Лукашенко матбуот хизматига кўра, Левая афв этилган. У 2024 йил май ойида Полшададан Беларусга қайтганидан сўнг қўлга олинган ва “экстремистик фаолиятни молиялаштириш” айби билан 6 йилга озодликдан маҳрум этилган — Беларус ҳокимияти одатда мустақил ташаббусларга қилинган хайрияларни шундай баҳолайди.

Собиқ сиёсий маҳбуса Марина Золотова сўзларига кўра, Наталя Леваянинг ҳомиладорлиги қамоқда бошланган. Наталя колонияда қарийб икки йил ўтирган. Туғуруқ март ойида кутилмоқда.