Лукашенко Беларус урушга тайёрланаётганини айтди

1 апрел, чоршанба куни Беларус Қуролли кучларининг комплекс текшируви якунларига бағишланган йиғилишда сўзлаган Александр Лукашенко, Беларус урушга тайёрланаётганини маълум қилди. Унинг сўзларига кўра, мамлакатда “тинч давр деган нарса бўлиши мумкин эмас”. Бу ҳақда Лукашенко матбуот хизмати сайтида эълон қилинган хабарда айтилган.

Беларус раҳбари мазкур текширувни “ҳар қачонгидан ҳам кенг кўламли ва қаттиққўл” деб атаган. Унинг айтишича, текширув давомида ҳарбий бўлинмалар об-ҳаво шароити ва куннинг қайси вақти эканидан қатъи назар, жанг ҳолатига имкон қадар яқин шарт-шароитларда синовдан ўтказилган.

“Биз урушга тайёргарлик кўряпмиз. Қуролли кучларни шунинг учун тузганмиз, шунинг учун уларни сақлаяпмиз, халқ ҳам шунга маблағ ажратяпти. Агар бирор ким биз билан қурол нишони орқали гаплашмоқчи ва бизга шу тарзда қарамоқчи бўлса, биз жавоб қайтарамиз. Биз ана шу ҳолатга тайёргарлик кўряпмиз”, — дея Лукашенконинг сўзларини келтиради унинг матбуот хизмати.

Унинг таъкидлашича, уруш юз берган тақдирда Беларус қўшинлар сонини 500 минг нафаргача етказиши мумкин. Лукашенко сўзларига кўра, текширув чоғида қўйилган вазифалар даражаси ва уларни бажариш суръати геосиёсий вазиятнинг жиддийлиги, шунингдек, Беларус чегараларига яқин ҳудудларда юз бераётган воқеалар ва таҳдидлар билан боғлиқ бўлган. Бундан олдин у Беларусга ҳужум “учинчи жаҳон урушига кириш қисми” бўлишидан огоҳлантирган эди.

Александр Лукашенко ва КХДР олий раҳбари Ким Чен Ин 26 март куни Пхенянда икки давлат ўртасида дўстлик ва ҳамкорлик тўғрисида шартнома имзолади. Бу ҳақда Шимолий Корея давлат ахборот агентлиги — KCNA хабар берди.

Лукашенко матбуот хизмати эса ушбу “фундаментал ҳужжат” имзоланганидан кейин Беларус ва Шимолий Корея ўртасидаги муносабатлар “янги босқичга кўтарилаётганини” билдирди.

Матбуот хизмати баёнотига кўра, КХДР раҳбари Беларусга “ҳамжиҳатлик ва тўлиқ қўллаб-қувватлов” билдирган ҳамда Ғарбнинг Минскка нисбатан “ноқонуний босими”га қарши чиққан. Шунингдек, Лукашенко Беларус ва КХДР ҳукуматлари халқаро масалалар бўйича “бир хил қараш”га эга эканини айтган.

Лукашенко 25 март куни Шимолий Кореяга биринчи расмий ташриф билан борган эди. КХДР ва Беларус Россиянинг Украинага қарши урушида Москвага катта ёрдам кўрсатиб келмоқда. Пхенян Россияга ўқ-дори ва шимолий кореялик ҳарбийларни юбормоқда. Минск эса 2022 йил феврал ойида Россияга Беларус ҳудудидан Украинага кенг кўламли ҳужум қилиш учун плацдарм сифатида фойдаланиш имконини берган ва шу ерда Россиянинг тактик ядровий қуролларини жойлаштиришга розилик билдирган.