«Да Луш»даги можаро: Винисиусни «маймун» деб камситишди

Европа Чемпионлар Лигаси плей-оффи доирасидаги «Бенфика» — «Реал» ўйинини футбол мухлислари қизиқиш билан томоша қилди. Чунки Моуринио бошчилигидаги «Бенфика» олдинги босқичда «Реал»ни сенсацион тарзда мағлуб этганди. Лекин икки катта клуб ўртасидаги бу галги тўқнашув олдингиси каби дарвозабон гол ургани билан эмас, ёқимсиз воқеа билан ёдда қолди.

«Бенфика»нинг аргентиналик футболчиси Жанлука Престиани «Реал»нинг қора танли футболчиси Винисиус Жуниорни «маймун» деб атаб ҳақорат қилди. Бу жуда ёмон воқеа бўлди. Шунчалик ёмонки, собиқ «Барселона» ўйинчилари Винисиусни қўллаб чиқди.

Нима бўлди ўзи?

Воқеа 18 феврал куни Лиссабондаги «Эстадио да Луш» стадионида содир бўлди. Мадриднинг «Реал» клуби Чемпионлар Лигаси олдинги босқичида кучли саккизликка кира олмагани учун плей-оффда ўйнашга мажбур бўлди. Алваро Арбелоа мураббийлигида ўйнаётган «Реал» шу куни Жозе Моуринио қўл остидаги «Бенфика» меҳмони бўлди. Учрашув 1:0 ҳисобида «Реал»нинг ғалабаси билан тугади. 50-дақиқада Винисиус Жуниор жуда чиройли гол уриб, Мадридга ғалаба келтирди. Барчаси ана шу голдан кейин бошланди...

Вини чиройли гол урганидан завқланиб, қанотдаги байроқча олдига бориб, бразилчасига рақсга тушди. Мезбон мухлислар ўзларига қараб рақсга тушган футболчига ҳуштакбозлик қилишди. Кейинроқ Винисиус ҳакамнинг олдига югуриб бориб, «Бенфика» футболчиларидан бири уни ҳақорат қилганини айтди.

Бу эпизоддан олдинроқ мезбонларнинг аргентиналик футболчиси Жанлука Престиани қўлини оғзига қўйиб Винига нимадир деганини кўриш мумкин. «Реал» етакчисининг айтишича, Престиани уни камида беш марта «маймун» деб ҳақорат қилган. Мадридликлар ҳужумчиси Мбаппе ҳам буни тасдиқлади. Килиан одатда футболдан ташқари мавзулар ҳақида гапирмайди, лекин бу ўйиндан кейин чиқиш қилиб, Преситани Винисиусни ирқчилик кайфиятида ҳақорат қилганини айтди.

Футбол оиласи иккига бўлинди

Чемпионлар Лигаси плей-оффининг барча ўйинлари мана шу эпизод соясида қолиб кетди, чунки Вини билан боғлиқ ҳолатда дунё футболидаги оғир мавзу яна ўртага чиқди. Мухлислар, футбол оиласи иккига бўлинди. Аксар футболчилар, мухлислар, мураббийлар бунақа футболда ирқчиликка ўрин йўқлиги ҳақида гапирди, ҳатто собиқ «Барселона» футболчиси Тиери Анри бу ҳолатда «Мен мадридистман», деб чиқди.

Бироқ бир гуруҳ футбол одамлари Винисиусни айблаб чиқди. Улар нега доим Вини билан шунақа воқеалар содир бўлади, деган мантиққа асосланиб, бразилиялик футболчини танқид қиляпти. Хусусан, «провокациялар қироли» Жозе Моуринио ҳам шундай фикр билдирди. Айтганча, Вини супер гол урган ўйин охирида Моуринио қизил карточка олди ва Мадриддаги жавоб ўйинини ўтказиб юборадиган бўлди.

Чиндан Винисиус Жуниор можаро марказида бўлишни яхши кўрадиган футболчи. Испаниянинг кўп стадионларида, айниқса Валенсияда уни жуда ёмон кутиб олишади, ҳуштакбозлик қилишади. Лекин бу Винисиус провокатор дегани эмас. У кучли ўйинчи, ҳимоячиларни кўрдим демай алдаб кетади, чиройли голлар уради. Ягона айби қанотда ўйнагани учун мухлислар уни ҳақорат қилганини эшитиб чидаб туролмайди ва жавоб беради. Кейин гол уриб уларга қараб нишонлайди. Футболчи кар бўлиши керак, деган олтин қоидага амал қилмайди.

Лекин унинг ўрнида бўлишни тасаввур қилиш учун қора танли одам бўлиш керак, менимча. Сизни Худо қора қилиб яратган бўлса-ю, одамлар худди бу камчиликдек масхара қилса, «маймун» деса, маймуннинг овозини чиқарса, банан улоқтирса, бунга чидаш қийин. Эътибор берган бўлсангиз, ирқчилик билан боғлиқ можароларга тезда қора танли футболчилар муносабат билдириб чиқади, чунки улар буни ўз танасида ҳис қилган.

Шу ўринда бир нарсани унутмаслик керак, аргентиналик футболчилар орасида миллатчилик кайфияти жуда кучли. «Да Луш»даги ўйин давомида Престианидан ташқари яна бир аргентиналик футболчи, «Бенфика» сардори Николас Отаменди Винисиусни провокация қилди. У «Реал» футболчисига қорнидаги жаҳон кубоги ва Америка кубокларининг татуировкасини кўрсатди, худди сенда бунақа мукофот йўқ, дегандай.

Энцо Фернандес деган ирқчи ўз саҳифасида жонли эфир қилаётганда аргентиналик футболчилар жамоа бўлиб франциялик қора танли футболчиларни камситганди. Айтмоқчи бўлганим, ўша эпизодда Винисиусни эмас, провокаторлар Престиани ва Отамендини жазолаш керак.

Ва кўпчилик Винисиусни айблаётганлар бир жиҳатга эътибор бермаяпти. У ўша куни Чемпионлар Лигасида гол урди, футбол тарихидаги энг зўр мусобақа плей-оффида. Бу ажойиб турнир мусиқасини эшитибоқ миллионлаб мухлислар юраги жунбишга келади. Энди Чемпионлар Лигасида мусобақа тарихидаги энг совриндор жамоа сафида 70 минг рақиб мухлислари кўз ўнгида супер гол ургандаги ҳиссиётни тасаввур қилаверинг.

Бунақа вақтда эркак одам ҳиссиётларини жиловлаши қийин бўлади. Вини ўз голидан завқланиб, уни рақс билан нишонлади, бу ҳеч қанақасига ҳақорат эмас. Агар Винининг гол нишонлаши ҳақорат бўлса, Роналду ва Симеоненинг гол нишонлашлари нима дейилади? Бир нарса аниқ, Винисиус ажойиб футболчи ва ёш йигитлар айнан унга ўхшаган чиройли ўйин кўрсатадиган атлетларга қараб футболга меҳр қўяди, Престианига ўхшаган ирқчи расистларга қараб эмас...