Уиткофф Зеленский ва Путин яқин орада учрашиши мумкинлигини истисно этмади

АҚШ президенти Доналд Трампнинг махсус вакили, Украинада тинчликка эришиш бўйича саъй-ҳаракатларда АҚШ делегациясининг асосий музокарачиси Стивен Уиткофф Украина президенти Володимир Зеленский ва Россия президенти Владимир Путиннинг яқин орада шахсан учрашиши эҳтимолини истисно қилмади. Уиткофф Fox News телеканали эфирида шанба, 21 феврал куни, АҚШ саъй-ҳаракатлари шундай учрашувга ҳатто яқин 3 ҳафта ичида олиб келиши мумкинлигини билдирди.

Унинг сўзларига кўра, у ва Трампнинг куёви Жаред Кушнер (у ҳам Киев ва Москва билан музокараларда иштирок этмоқда) “оптимистик кайфиятда”. Улар ўз таклифлари “яқин уч ҳафта ичида томонлар позицияларини яқинлаштиришга ёрдам беради” деб умид қилмоқда.

Бундан ташқари, Уиткофф Трамп иштирокида уч томонлама учрашув ўтказилиши эҳтимолини ҳам рад этмади — агар Трамп тинчлик келишуви тузиш истиқболини кўрса. “Менимча, у (Трамп) агар ишни охиригача етказиб, энг яхши натижага эриша олишига ишонмаса, учрашувда қатнашишни хоҳламайди”, — деди АҚШ президентининг махсус вакили. У, шунингдек, “яқин ҳафталарда яхши янгиликлар” бўлишига умид билдирди.

Уиткофф Путин билан бир неча бор шахсан учрашгани учун айтилган танқидларни ҳам рад этди ва қарши томон позициясини тушунмасдан туриб “келишув тузиб бўлмас”лигини таъкидлади. “Мен унинг мотивацияси, мақсадлари ва ҳоказоларни тушуниб олишим керак эди”, — деб изоҳлади у. Трамп махсус вакилининг айтишича, Россия раҳбари уларнинг шахсий учрашувлари давомида “ҳамиша жуда очиқ” бўлган ва ўзининг “қизил чизиқлари”ни тўғридан тўғри белгилаб берган.

Володимир Зеленский бир неча бор Россия президенти билан шахсан учрашишга тайёр эканини билдирган, аммо бунинг учун Москвага келиши ҳақидаги таклифларни рад этган ва жавобан уни Киевга таклиф қилган. Хусусан, бир неча кун олдин у Путин билан учрашув масаласини “кўтариш”ни топширганини айтди. У энг юқори даражадаги шахсий музокараларни ҳудудий масала ечимини топишдаги танаффусни таъминлайдиган энг яхши йўл деб атаган. Шунинг учун, Зеленскийнинг сўзларига кўра, у музокарачи жамоасига икки лидернинг Женевада учрашуви масаласини кўтаришни топширган.

Январ ойи охирида Зеленский Россия билан музокараларда ҳудудий масалани ҳал этиш Кремл раҳбари билан алоқаларсиз мумкин эмаслигини таъкидлаган эди. “Биз қандайдир форматда Россия Федерацияси билан, жумладан Россия етакчиси билан ҳам алоқада бўлиш имкониятига эга бўлишимиз керак. Бундай форматсиз, мен кўраётганимдан келиб чиқиб айтсам, жамоаларимиз ҳудудий масалалар бўйича келиша олмайди”, — деган у.