Австралия Украинага ёрдамни давом эттиради: РФга қарши янги чекловлар

Россиянинг Украинага қарши тўлақонли уруш бошлаганига тўрт йил тўлиши муносабати билан Австралия ҳокимияти Россияга нисбатан қўшимча санкциялар жорий қилди. Сешанба куни, 24 февралда Австралия бош вазири Энтони Албанезе, мудофаа вазири Ричард Марлз ва ташқи ишлар вазири Пенни Вонгнинг қўшма баёнотида айтилишича, бу — 2022 йил февралдан бери Австралия киритган энг катта санкциялар пакетидир.

Янги жазо чоралари РФнинг молиявий, банк ва мудофаа секторларига, унинг авиация, нефт-газ ва транспорт саноатига, шунингдек илмий-техника соҳасига қаратилган. Баёнотда таъкидланишича, бу чоралар Россия даромадларини қисқартириш ва унинг Украинага қарши урушни давом эттириш имкониятларини янада чеклашга қаратилган. “Қора рўйхат”га яна 180 нафар жисмоний ва юридик шахс, шунингдек Россиянинг “соядаги флоти”га тааллуқли кемалар киритилди, умуман олганда эса уруш бошланганидан бери мамлакат РФга қарши 1800 дан ортиқ санкция жорий қилган.

Баёнот муаллифлари тушунтиришича, банк ва молия соҳаси урушни давом эттириш учун технология ва ускуналарни харид қилишни таъминлайди, нефт-газ ва транспорт секторлари Россия ҳокимиятига даромад келтиради, авиация ва мудофаа секторлари эса РФ ҳарбий салоҳиятини ривожлантиришда ҳал қилувчи аҳамиятга эга. Бундан ташқари, Австралия биринчи марта чет элдаги тўловлар (трансчегаравий тўловлар) орқали санкцияларни четлаб ўтишга хизмат қилаётган криптовалюта компанияларига нисбатан ҳам жорий қилди.

Баёнотда шундай дейилади: “Бугун Россиянинг Украинага тўлақонли босқини бошланганига тўрт йил бўлди — бу халқаро ҳуқуқнинг, жумладан БМТ низомининг қўпол бузилиши. Суверен демократик қўшнига қарши тўрт йиллик ҳеч қандай сабабсиз Россия тажовузи. Австралия Украина учун адолатли ва барқарор тинчликка эришишга қатъий содиқ. Украина халқининг жасорати ва матонатини юксак қадрлаймиз”.

Австралия ҳокимияти, шунингдек, Украинага жами 1,7 млрд доллардан ортиқ ёрдам ажратганини, шундан 1,5 млрд доллари ҳарбий қўллаб-қувватлаш эканини маълум қилди. Канберрада Россия қиш фаслини Украинага қарши “қурол” сифатида ишлатишда давом этаётгани ва муҳим энергетика инфратузилмасига берилган зарбаларни кучайтираётгани эслатилди. Австралия Украина Энергетикасини қўллаб-қувватлаш жамғармасига 40 млн доллар йўналтирган, жумладан 10 млн доллар қиш даврида муҳим инфратузилманинг ишлашини таъминлаш учун ажратилган.

Албанезе, Марлз ва Вонг қўшимча қилди: “Австралия яна бир бор Россияни урушни дарҳол тўхтатишга ва халқаро ҳуқуқий мажбуриятларини, жумладан тинч аҳолини ҳимоя қилиш ва ҳарбий асирларга муносабат бўйича мажбуриятларни бажаришга чақирмоқда. Бугун ва ҳар куни Австралия Украина суверенитети ва ҳудудий яхлитлигини таъминлайдиган, Европада хавфсизлик ва барқарорликни қўллаб-қувватлайдиган ҳамда Россиянинг тажовузни қайта бошламаслигини кафолатлайдиган адолатли ва барқарор тинчликка эришиш учун ҳаракат қилишда давом этади”.