G7 етакчилари Украинани қатъий қўллаб-қувватлашини тасдиқлади

Россиянинг Украинага қарши тўлақонли босқини бошланганининг тўртинчи йиллиги кунида АҚШни ҳам ўз ичига олган етти етакчи саноатлашган мамлакат Киевга бўлган қатъий қўллаб-қувватлашини яна бир бор тасдиқлади. Сешанба куни, 24 февралда эълон қилинган қўшма баёнотда G7 етакчилари Украинага “унинг ҳудудий яхлитлиги ва мавжуд бўлиш ҳуқуқини, шунингдек эркинлиги, суверенитети ва мустақиллигини ҳимоя қилиш” йўлида кейинги ёрдамни ваъда қилди.

“Катта еттилик” баёнотида, шунингдек, АҚШ президенти Доналд Трамп бошлаган тинчлик жараёнини қўллаб-қувватлаш давом этиши, шунингдек Украина ва Россия ўртасида тўғридан тўғри музокаралар ўтказишга қаратилган саъй-ҳаракатлар ҳақида айтилган. “Европа бу жараёнда етакчи рол ўйнайди, унга бошқа ҳамкорлар ҳам қўшилмоқда”, — дейилади ҳужжатда.

Баёнот муаллифлари таъкидлашича, тўғридан тўғри музокаралардан кейин урушни тугатиш бўйича келишувни “фақат Украина ва Россия” тузиши мумкин. Улар, шунингдек, “кўнгиллилар коалицияси” доирасида ўз зиммасига олган “Украинага ишончли ва асосли хавфсизлик кафолатларини тақдим этиш” мажбуриятларини ҳам тасдиқлади. G7 етакчилари қиш мавсумида Украина энергетика инфратузилмасига ўқ узишлар кучайган бир пайтда Украинага кўмак бериш бўйича саъй-ҳаракатларни олқишлади.

G7 етакчилари шундай деди: “Биз ядровий хавфсизликни таъминлашда, жумладан Европа тикланиш ва тараққиёт банки ҳамда Украина билан бирга, Чернобил АЭСдаги ҳимоя қопламаси (саркoфаг)ни имкон қадар тезроқ тиклаш учун маблағ йиғилишини қўллаб-қувватлаш ва бутун қитъа учун оғир ҳуманитар ҳамда экологик оқибатларга олиб келиши мумкин бўлган ҳар қандай радиологик ҳодисаларнинг олдини олиш мақсадида яқиндан ҳамкорлик қилиш мажбуриятини оламиз.”

Ҳужжатда, шунингдек, украин болаларининг “дарҳол, хавфсиз ва шартсиз қайтарилиши”ни таъминлашга қаратилган ташаббуслар қўллаб-қувватланиши ҳам қайд этилган.

G7'да раислик қилаётган Франция эслатишича, бу — Трамп бир йилдан ортиқ вақт олдин Оқ уйга қайтганидан кейин “Катта еттилик” давлатларининг биринчи қўшма баёнотидир. G7 таркибига АҚШ, Канада, Италия, Япония, Буюк Британия, Германия ва Франция киради. Охирги уч давлат алоҳида баёнот билан ҳам чиқиб, Украинада адолатли ва барқарор тинчликка бўлган қатъий содиқлигини алоҳида таъкидлади.