Пекин: Украинадаги уруш Хитой ва ЕИ муносабатларига халақит бермаслиги керак

“Украина инқирози” Хитой-Европа муносабатларида муаммога айланмаслиги лозим, деб баёнот берди Хитой ТИВ расмий вакили Мао Нин сешанба куни, 24 февралда — Россиянинг Украинага бостириб кирганига 4 йил тўлган кунда ва Германия канцлери Фридрих Мерцнинг Пекинга ташрифи арафасида.

Мао Ниннинг сўзларига кўра, Хитой можарони сиёсий йўл билан ҳал этишга қаратилган дипломатик саъй-ҳаракатларни қўллаб-қувватлайди. Хитой Халқ Республикаси “ҳеч қачон оловга ёғ сепмаган ва юзага келган вазиятдан фойда кўрмаган”, деб таъкидлади у. Мерцнинг урушда Хитойнинг роли ҳақидаги гапларига муносабат билдириш асносида Мао Нин тўғридан тўғри жавоб беришдан қочиб, канцлер ташрифи давомида томонлар ўзаро қизиқиш уйғотадиган масалалар бўйича фикр алмашишини айтди.

Бундан олдин Берлинда Мерц шундай деган эди: “Агар (Хитой раиси — таҳр.) Си Жинпинг эртага Путинга ‘буни тўхтат’ деса, у индингача мажбур бўлиб тўхтатади”. Христиан-демократ сиёсатчининг айтишича, Хитой ҳануз Россияни нефт ва газ сотиб олиш ҳамда технологиялар етказиб бериш орқали қўллаб-қувватлаб келмоқда.

Пекин, ўз навбатида, Германия канцлерининг ташрифидан ижобий натижа кутaётганини билдирди. Мао Ниннинг сўзларига кўра, Хитой бу ташрифни ўзаро тушуниш ва ишончни чуқурлаштириш, шунингдек амалий ҳамкорликни ривожлантириш учун имконият сифатида қўллашга тайёр.

Хитой Савдо вазирлиги алоҳида баёнотида тахминан 30 кишидан иборат Германия иқтисодий делегациясининг таркибини юксак баҳолаб, бу Берлин икки томонлама савдо-иқтисодий алоқаларни чуқурлаштиришга тайёр эканининг далили эканини айтди. Вазирликда, шунингдек, Хитой Германия билан иқтисодий ва савдо-сиёсий ҳамкорликка катта аҳамият бериши таъкидланди.