Луврда “аср ўғрилиги”дан сўнг директор алмашди

Лувр директори Лоранс де Кар машҳур музейдаги “аср ўғрилиги”дан тўрт ой ўтиб лавозимини тарк этди. Унинг ўрнига аввал Версал саройига раҳбарлик қилган Кристоф Лерибо тайинланди.

Фото: Picture Alliance

Луврнинг янги директори этиб санъат тарихи бўйича мутахассис Кристоф Лерибо тайинланди. У шов-шувли музей ўғрилигидан кейин истеъфо берган Лоранс де Карнинг ўрнини эгаллайди. Бу ҳақда Франция ҳукумати расмий вакили Мод Брежон чоршанба, 25 феврал куни маълум қилди.

Bloomberg ёзишича, 62 ёшли Лерибо мазкур тайинловгача Версал саройига раҳбарлик қилган, ундан олдин эса Париждаги Орсе музейини бошқарган. Франция Маданият вазирлиги унинг асосий устувор йўналишлари музей хавфсизлигини мустаҳкамлаш ва уни модернизация қилиш бўлишини билдирди. Президент Эммануэл Макрон аввалроқ Луврда 800 млн евро қийматида янгилаш (реновация) режасини эълон қилган эди.

Париждаги Лувр директори Лоранс де Кар бутун дунёга машҳур музейдаги катта ўғирликдан тўрт ой ўтиб истеъфо берди. Елисей саройи сешанба, 24 феврал куни Франция президенти Эммануэл Макрон унинг истеъфосини қабул қилганини хабар қилди.

Баёнотда: “Дунёнинг энг йирик музейига ҳозир тинчлик ва хавфсизлик ҳамда модернизация соҳасидаги муҳим лойиҳаларни амалга ошириш учун янги кучли турткилар керак”, — дейилган.

Директор истеъфоси 19 октябр куни содир этилган “аср ўғрилиги” бўйича парламент тергов комиссияси ҳисоботи тақдим этилганидан кейин бир ҳафта ҳам ўтмай рўй берди. Ҳисоботда Лувр раҳбарияти Франция қироллик регалиялари ўғирланишида қисман масъул, деб топилган. Комиссия раҳбари Александр Порте, де Карни назарда тутган ҳолда, шундай деди: “Бошқа мамлакатлар ва муассасаларда бундай камчиликлар рўйхати аллақачон истеъфоларга олиб келган бўлар эди”.

Турли томонлардан танқидга учраган музей директори ўғриликдан кейинги куннинг ўзидаёқ истеъфо беришни таклиф қилган, аммо ўшанда Франция маданият вазири Рашида Дати унинг таклифини рад этган эди. Энди эса истеъфони Макрон қабул қилди.

Октябрда тўрт нафар эркак Луврдан Франция қироллик регалияларининг бир қисмини ўғирлаб кетган, уларнинг номинал қиймати 88 млн евро деб баҳоланган — экспонатларнинг тиклаб бўлмас тарихий қиймати эса бундан ҳам юқори. Ўғирланган буюмлар ҳозиргача топилмаган.

Воқеадан кейин музей бир неча бор салбий сарлавҳаларга тушган — хусусан, бир неча марта сув босиш ҳолатлари, иш ташлашлар, ҳамда 10 млн еврога тенг чипталар бўйича йирик фирибгарлик гумонлари сабаб.