Қўшимча функционаллар
-
Тунги кўриниш
Куба чегарачилари ўққа тутган катерда америкаликлар бўлган
CNN хабар беришича, Куба чегарачилари томонидан ўққа тутилган катерда ҳалок бўлган тўрт кишидан бири АҚШ фуқароси бўлган. Яна бир америкалик яраланган ва ҳозир Кубадаги шифохоналардан бирида даволанмоқда. Вашингтон воқеани текширувдан ўтказмоқда.
Фото: Adalberto Roque/AFP
Флоридадан чиққан тезюрар катерда бўлган тўрт қурбондан бири АҚШ фуқароси экани маълум бўлди — Куба чегарачилари ўша катерга ўқ очган. Бу ҳақда 26 феврал, пайшанба куни CNN телеканали хабар берди. Яраланган яна бир америкалик Кубадаги шифохоналардан бирида тиббий ёрдам олмоқда.
Кеча АҚШнинг Флорида штатида рўйхатдан ўтган тезюрар катер Фалконес-Кей ороли ёнида Кубанинг ҳудудий сувларига кирган. Куба Ички ишлар вазирлиги маълум қилишича, чегарачилар уни идентификация қилиш учун яқинлашган, шундан сўнг катердаги йўловчилар чегарачиларга ўқ узган. Отишма оқибатида тўрт киши ҳалок бўлган, яна олти киши яраланган.
Куба ҳукумати катер экипажида «террористик ниятлар» бўлганини билдирди. Мамлакат Ички ишлар вазирлиги баёнотида «бортда Кубага ноқонуний кириб келишни истаган ўн нафар қуролланган шахс бўлгани» айтилган. Шунингдек, катердагилар АҚШда яшовчи, Кубадан чиққан муҳожирлар экани қайд этилган.
АҚШ ҳукумати ушбу воқеа бўйича ўз текширувини ўтказишини билдирди. Хусусан, АҚШ Давлат департаменти раҳбари Марко Рубио Кубанинг денгиз чегараси америкалик катер томонидан бузилгани Қўшма Штатларнинг қандайдир операциялари билан боғлиқ эмаслигини таъкидлади.
