NASA астронавтларнинг Ойга қўнишини 2028 йилга қолдирди

Астронавтларнинг Ойга қўниши 2028 йилнинг боши ёки охирида амалга оширилиши мумкин. Бу ҳақда NASA раҳбари Жаред Айзекман маълум қилди. Парвозни Artemis III миссияси давомида ташкил этиш режалаштирилган эди - бу Американинг Artemis Ой дастурининг сўнгги босқичидир.

Artemis дастурининг асосий мақсади 1972 йилда «Аполлон-17» муваффақиятини такрорлаш ва инсоннинг Ойда бўлишини тиклашдир. Ҳаммаси бўлиб учта парвозни ташкил этиш режалаштирилган: Ой атрофида учувчисиз (Artemis I), Ой атрофида бошқариладиган (Artemis II) ва астронавтлар экипажини Ер табиий йўлдошининг жанубий қутбига қўндириш (Artemis III). Миссиянинг сўнгги босқичи 2027 йил ўрталарига режалаштирилган эди.

Айзекманнинг таъкидлашича, NASA Artemis II миссиясининг кечикиши ва қийинчиликлари туфайли Artemis Ой дастурини қайта кўриб чиққан. Энди 2027 йилга мўлжалланган Artemis III парвози Ойга қўнишни назарда тутмайди.

«Бунинг ўрнига миссия Orion кемасини Ер атрофидаги паст орбитада намойиш этиб, Ойга қўниш модулларининг бир ёки иккала етказиб берувчиси билан уланишни машқ қилади», деди Айзекман.

Artemis II миссиясининг апрель ойидаги эҳтимолий парвози ва Ойга қўниш жараёни ўртасига компания яна бир нечта оралиқ миссияларни қўшади. NASA раҳбарининг сўзларига кўра, бундай стратегия парвознинг «мушак хотирасини» яхшилашга ёрдам беради. Агар ҳаммаси муваффақиятли ўтса, астронавтлар 2028 йил бошида Artemis IV миссияси ва 2028 йил охирида Artemis V миссияси пайтида Ойга қўнади.

Artemis I миссиясининг учирилиши 2022 йил август ойида бўлиб ўтди. Шунда Orion космик кемаси Ойга муваффақиятли учирилди, уни айланиб ўтиб, ноябрь ойида Тинч океанига қўнди. Artemis II ва Artemis III парвозлари олдинги парвозлар пайтида Orion космик кемасининг ҳаётий таъминот тизимлари ва иссиқлик экранида аниқланган камчиликлар туфайли кўчирилди.