Қўшимча функционаллар
-
Тунги кўриниш
Зеленский: РФ ва АҚШ билан янги музокаралар БААда ўтиши мумкин
Украина президенти Володимир Зеленский 26 феврал куни кечқурунги мурожаатида Украина, Россия ва АҚШ вакилларининг янги учрашуви март ойи бошида БАА пойтахти Абу-Дабида ўтиши мумкинлигини маълум қилди. У бу баёнотни Женевада бўлиб ўтган украиналик ва америкалик делегациялар маслаҳатлашувларини шарҳлар экан айтди.
Зеленскийнинг сўзларига кўра, «ҳақиқий хавфсизлик кафолатлари бўйича эришилган натижаларни якунлаш ва лидерлар даражасидаги учрашувни тайёрлаш зарур». Унинг фикрича, «айнан шундай формат Украинадаги урушни тўхтатиш бўйича музокараларда кўп нарсани ҳал қилиши мумкин».
«Урушни тугатиш керак — бу бизнинг позициямизни, Украина позициясини ва барча ҳамкорларимиз позициясини ифода этади. Аммо, афсуски, ҳозир ҳамма Россиянинг тинчликка тайёр эмаслигини кўрмоқда. Путин ўз ҳарбий машинасини тўхтатаётгани ҳақида ҳеч қандай белги йўқ. Аксинча, у урушни давом эттиришга тайёрланмоқда. Шунинг учун дунё Россияга босим ўтказишга тайёр бўлиши керак», — деди Зеленский.
Аввалроқ Axios нашри Оқ уйдаги манбага таяниб хабар беришича, АҚШ президенти Доналд Трамп Зеленский билан суҳбатда Украинадаги урушни имкон қадар тезроқ, ҳатто бир ой ичида якунлашни исташини билдирган.
Гап Россиянинг Украинага қарши тўлиқ миқёсли босқинининг тўрт йиллиги эртаси куни бўлиб ўтган телефон мулоқоти ҳақида кетмоқда. Нашр манбаларига кўра, «президентлар суҳбати жуда дўстона ва ижобий руҳда ўтган».
Axios маълумотига биноан, суҳбат давомида Зеленский АҚШ раҳбарига Украинага кўрсатилаётган ёрдам учун миннатдорлик билдирган ва фақат Трамп Путинни урушни тўхтатишга мажбур қила олишини таъкидлаган. Трамп эса ўз навбатида АҚШ Россия билан эҳтимолий тинчлик келишуви доирасида Украинага «муҳим хавфсизлик кафолатлари» беришга тайёрлигини билдирган.
