Мерц: Россияда йўқотишлар 1 млндан ошган бўлиши мумкин

Фридрих Мерц фикрича, Украинага қарши тўрт йил давом этган кенг кўламли уруш Россия учун асоратсиз ўтмади. “Россия иқтисодиёти сезиларли даражада заифлашди. Россия қуролли кучлари мисли кўрилмаган инсон йўқотишларини кўрди. Россиянинг бугунги ‘колосси’ лойдан бўлган оёқларда турибди”, — деди ГФР канцлери 3 март, сешанба куни Оқ уйда АҚШ президенти Доналд Трамп билан музокаралардан кейин журналистлар олдида чиқиш қилиб.

Шу фондан келиб чиқиб, Мерцнинг айтишича, Вашингтон Москвага босимни кучайтириши керак — бу Владимир Путинни тинчлик музокараларида ён босишга мажбур қилиш учун зарур. “Россия вақтни чўзяпти. Шу билан у Америка президентининг иродасига қарши ҳаракат қилмоқда. Бугунги музокараларда мен Москвага босимни кучайтиришга чақирдим”, — деди канцлер.

Унинг баҳосига кўра, урушда ҳалок бўлган ва яраланган россияликлар сони 1 миллион кишидан ошган.

Канцлер таъкидлашича, Трамп билан суҳбатда у “Европада Владимир Путин Украина ва Европа учун баробар даражада мақбул бўладиган тинчлик келишувини қабул қилишга тайёрлигига нисбатан катта шубҳалар бор”лигини очиқ айтган.

Шунинг учун, Мерц фикрича, АҚШ воситачилигида РФ ва Украина ўртасида кечаётган тинчлик музокараларига Европа ҳам қўшилиши керак. Унинг сўзларига кўра, у бу фикрни Трампга етказишга уринган.

“Президент Трамп билади: фақат Европа қўллаб-қувватлашга ва қонуний, деб тан олишга тайёр бўлган тинчлик узоқ умрли бўлади”, — деди ГФР канцлери. Фридрих Мерц аниқлик киритишича, европаликлар Россиянинг Украинага қарши уруши бўйича ечим топилишини истайди, аммо Европа позицияси инобатга олинмасдан, “бош узра”, яъни европаликларни ҳисобга олмаган ҳолда тузилган келишувни қабул қилмайди.