Қатарда Эрон корпуси фойдасига жосусликда гумонланган ўн киши қўлга олинди

Қўлга олинганлар ИИМК учун ишлаш, стратегик объектлар бўйича жосуслик қилиш ва диверсиялар тайёрлашда гумонланмоқда. Исроил–АҚШ операцияси бошланганидан кейин Эрон Вашингтон иттифоқчиларига Яқин Шарқда зарбалар бера бошлади.

Фото: Reuters

Қатар Давлат хавфсизлик хизмати Ислам инқилоби муҳофизлари корпуси (ИИМК) учун ишлашда гумон қилинган ўн нафар кишини қўлга олди, деб ёзади Qatar News Agency.

Нашрда айтилишича, гап “иккита ҳолат” ҳақида бормоқда. Хавфсизлик хизмати версиясига кўра, етти нафар гумонланувчи мамлакатнинг ҳаётий муҳим ва ҳарбий инфратузилмаси ҳақида разведка маълумотларини тўплаш мақсадида жосуслик билан шуғулланган. Яна уч нафари эса диверсион тадбирларни амалга ошириш учун тайинланган бўлиб, дронлар (учувчисиз аппаратлар)дан фойдаланишга ўқитилган.

Тинтув вақтида улардан, жумладан, “муҳим объект ва иншоотлар”нинг жойлашуви ҳамда координаталари топилган. Агентлик ёзишича, тергов жараёнида гумонланувчилар ИИМК билан алоқалари борлигини тан олган ва уларга “жосуслик ва қўпорувчилик операцияларини ўтказиш” топширилганини билдирган.

Шунингдек, мамлакат Мудофаа вазирлиги матбуот хизмати X'да Эрон Қатар ҳудудида жойлашган, Яқин Шарқдаги АҚШнинг энг йирик ҳарбий базаси ҳисобланган Ал-Удайд базасига икки баллистик ракета билан зарба берганини маълум қилди.

Бундан олдин, 2 март кечқурун Қатар Мудофаа вазирлиги мамлакат ҲҲК (ҳарбий-ҳаво кучлари) Эроннинг икки Су-24 самолётини уриб туширганини, ҲҲМ тизимлари эса мамлакат ҳудудига йўналтирилган етти баллистик ракета ва бешта дронни тутиб қолганини хабар қилган эди. 3 март куни Қатарда Эрон Доҳадаги Ҳамад халқаро аэропортига ҳужум қилишга урингани, аммо бу уринишлар муваффақиятсиз бўлгани айтилди.

Эрон Вашингтоннинг Яқин Шарқдаги иттифоқчиларига зарбалар беришни АҚШ ва Исроил 28 феврал куни Теҳронга қарши ҳарбий операцияга старт берганидан кейин бошлади. Бу зарбалар натижасида Эроннинг диний раҳбари — Али Хоминаий ва унинг оила аъзолари ҳалок бўлган.

Қатар ТИВ расмий вакили Мажид ал-Ансорий Эрон қиролликнинг фуқаролик инфратузилмаси объектларига қилинган ҳужум учун жавобгарликни ўз зиммасига олиши кераклигини айтди. Қатар ҳокимияти маълумотига кўра, қиролликка қилинган ҳужумлар муваффақиятли равишда қайтарилган, бироқ Эрон ракеталари парчалари тушиши натижасида мамлакат бўйлаб саккиз киши яраланган.