Трамп Эронга ултиматум қўйди

АҚШ президенти Доналд Трамп Эрондан “сўзсиз таслим бўлиш”ни талаб қилди. “Эрон билан ҳеч қандай келишув бўлмайди, фақат сўзсиз таслим бўлишдан бошқа йўл йўқ!” — деб ёзди у 6 март, жума куни Truth Social ижтимоий тармоғида.

Бундан сал олдин Эрон яна Форс кўрфази ҳудудидаги турли нишонларга ҳужум қилган эди.

Трамп шундай қўшимча қилди: Ислом Республикаси таслим бўлганидан кейин, АҚШ ва унинг иттифоқчилари Эронни “жар ёқасидан қайтаришга ва уни иқтисодий жиҳатдан ҳар қачонгидан ҳам каттароқ, яхшироқ ва кучлироқ қилишга” ёрдам беради.

Унинг айтишича, бунинг шарти — “ажойиб ва мақбул раҳбар” ёки бир неча раҳбарлик қилувчи шахсларни тайинлашдир. Трамп ўз постини қуйидаги шиор билан якунлади: “Эронни яна буюк қиламиз!”

5 март куни берган интервюсида Трамп ҳалок бўлган Эрон раҳбари Али Хоминаийнинг вориси масаласини ҳал қилишда иштирок этмоқчи эканини билдирди.

Эронда эҳтимолий номзодлар қаторида, жумладан, Хоминаийнинг ўғли Мужтабо ҳам тилга олинмоқда. Аммо Трамп уни “мақбул эмас” ва “жуда кучсиз шахс” деб рад этди.

АҚШ ва Исроил 28 феврал куни Эронга қарши кенг кўламли ҳаво ҳужумларини бошлади. Бу ҳужумлар натижасида Хоминаийдан ташқари Эрон раҳбариятининг бошқа аъзолари ҳам ўлдирилган.

Жавоб тариқасида Эрон 28 февралдан бери Исроилга, Форс кўрфазидаги қатор давлатларга ва минтақадаги Америка объектларига зарбалар бермоқда.