Раҳбар аёлларнинг йиллик рейтинги янгиланди

«Юксалиш» ҳаракати томонидан давлат ва жамият бошқарувида фаолият юритаётган раҳбар аёлларнинг янгиланган йиллик топ-40 рейтинги эълон қилинди. Рўйхатни шакллантиришда 100 нафардан ортиқ номзод фаолияти экспертлар томонидан таҳлил қилинди.

Маълум қилинишича, рейтинг бошқарувдаги натижалар, ислоҳотлардаги иштирок, соҳавий таъсир ва жамоатчилик ишончи каби мезонлар асосида тузилган.

Топ-40 рўйхатидан давлат ва жамият бошқарувининг турли бўғинларида фаолият юритаётган аёл раҳбарлар ўрин олган. Улар орасида президент администрацияси, Олий Мажлис палаталари, Вазирлар Маҳкамаси, вазирлик ва идоралар, маҳаллий ҳокимликлар, молия ва банк тизими, таълим ҳамда суд-ҳуқуқ тизимида фаолият юритаётган раҳбарлар бор.

Қайд этилишича, рейтингдан жой олган аёлларнинг кўпчилиги кейинги йилларда давлат бошқарувида юқорироқ лавозимларга тайинланган. Айримлари эса ҳудудий даражадаги раҳбарликдан республика даражасидаги лавозимларга кўтарилган. Шунингдек, қатор номзодлар соҳавий раҳбар, қўмита ёки агентлик даражасида қарор қабул қилиш жараёнларида фаол иштирок этмоқда.