Кошта Россияни Эрон билан урушнинг ягона “ғолиби” деб атади

Россия АҚШ ва Исроилнинг Эронга қарши давом этаётган урушидаги ягона “ғолиб”дир, деди Европа кенгаши раиси Антониу Кошта 10 март, сешанба куни Брюсселда ЕИ мамлакатлари элчилари олдида сўзлаган нутқида. Унинг таъкидлашича, энергия ташувчилар нархи ошиши туфайли Москва Украинага қарши урушни молиялаштириш учун янги ресурсларга эга бўлмоқда.

“Украинани қўллаб-қувватлашга йўналтирилиши мумкин бўлган ҳарбий имкониятларнинг бошқа томонга бурилиши унга фойдали. Шунингдек, Яқин Шарқдаги можаро биринчи ўринга чиқиб, Украина фронтига бўлган эътибор сусайганидан ҳам у ютмоқда”, — деди Кошта.

Европа кенгаши раҳбарининг фикрича, Европа Иттифоқи қоидаларга асосланган жаҳон тартибини ҳимоя қилиши керак, чунки унинг баҳосига кўра, ҳозир Вашингтон ҳаракатлари туфайли бу тартиб шубҳа остида қолмоқда. Шу билан бирга, Кошта ҳозирги вазиятнинг чуқур сабаблари учун масъулият Эрон зиммасида эканини ҳам таъкидлади. У ЕИ номидан Яқин Шарқдаги можаронинг барча томонларини кейинги эскалациянинг олдини олиш учун музокаралар столига қайтаришга чақирди.

Уруш туфайли стратегик жиҳатдан муҳим бўлган Ҳўрмуз бўғози орқали кемалар қатнови қаттиқ зарар кўрди. Тинчлик пайтида ушбу бўғоз орқали дунёдаги хом нефтнинг тахминан 20 фоизи ташилади. AFP агентлиги таъкидлашича, уруш бошланганидан бери бутун дунё бўйлаб нефт ва газ нархлари кескин ошди, ҳолбуки ғарб санкциялари Россиянинг нефт сотишдан оладиган даромадларини қисқартиришга қаратилган.

Антониу Кошта Брюсселда “янги воқелик” ҳақида гапириб, унда “Россия тинчликни бузмоқда, Хитой савдога халал бермоқда, АҚШ эса қоидаларга асосланган халқаро тартибни шубҳа остига қўймоқда”, деди. ЕИ Эрон халқини қўллаб-қувватлайди, аммо “эркинлик ва инсон ҳуқуқларига бомбалар ёрдамида эришиб бўлмайди”, — дея таъкидлади Европа кенгаши раиси.

Ислом инқилоби муҳофизлари корпуси (ИИМК) АҚШ президенти Доналд Трампнинг Эрон билан уруш тез орада тугаши мумкинлиги ҳақидаги сўзларига кескин муносабат билдирди.

“Уруш қачон тугашини айнан биз ҳал қиламиз. Жанг майдонидаги шароит ва урушнинг тугаши Ислом Республикаси қўлида”, — дейилади 9 март куни Tasnim агентлиги тарқатган баёнотда.

Бундан олдин Трамп Эронга қарши уруш кутилганидан анча тез тугаши мумкинлигини айтган эди. CBS News телеканали унинг телефон орқали берган интервюси якунларига таяниб келтиришича, Трамп шундай деган: “Менимча, уруш деярли тугади. Уларда на флот, на алоқа тизимлари, на ҳарбий-ҳаво кучлари бор”. Унинг қўшимча қилишича, уруш “режадан анча олдинлаб кетмоқда”.

Феврал ойи охирида Трамп уруш тўрт-беш ҳафта давом этиши мумкинлигини айтган эди, ўтган ҳафта охирида эса Оқ уй матбуот котиби Каролайн Ливитт бу муддатни тўрт-олти ҳафта деб атаган.