Трамп Эронда зарбалар учун нишонлар «деярли қолмаганини» айтди

Оқ уй раҳбари Эронга қарши ҳарбий операция тез орада якунланишини истисно қилмади.

Фото: Getty images

АҚШ президенти Доналд Трамп Эронга қарши ҳарбий операция тез орада якунланишига шама қилди. У ўз позициясини Америка кучлари ушбу ҳарбий операцияда жуда муваффақиятли ҳаракат қилаётгани ва аллақачон сезиларли ютуқларга эришгани билан асослади.

«(Эрон ҳудудида) зарба бериш учун нишонлар деярли қолмади», деди АҚШ президенти Axios нашрига. Унинг қўшимча қилишича, дастлаб Вашингтон операцияни олти ҳафта давом эттиришни режалаштирган.

АҚШ ва Исроил 28 феврал куни Эронга қарши ҳарбий операция бошлади. 11 март куни Исроил мудофаа вазири Исраэл Кац можаро «муддат бўйича ҳеч қандай чекловларсиз - қанча керак бўлса, шунча давом этишини» айтди. Исроил ва АҚШ расмийлари Эронга ҳужумлар камида яна икки ҳафта давом этишини кутмоқда, деб ёзди Axios. Шу билан бирга, Politico яқинда манбаларга таяниб, АҚШ Эронга қарши камида 100 кунлик операцияни режалаштираётгани ҳақида хабар берган эди.

Тайёрлаган Сардор Юсупов

#АҚШ #Эрон #Доналд Трамп

Эрон ядро дастури бўйича музокаралар расман тугамай туриб, 2026 йил 28 феврал куни АҚШ ва Исроил Эрон ҳудудига зарбалар бера бошлади. Президент Доналд Трамп ҳужумлардан мақсад Теҳрондаги режимни ағдариш эканини эълон қилди.