Венгрияда Украинанинг ЕИга қўшилишига қарши резолюция қабул қилинди

Венгрия Миллий мажлиси 10 март, сешанба куни Украинанинг Европа Иттифоқига аъзолигини, Киевга ҳарбий ёрдамни кейинги молиялаштиришни ва “Европа Иттифоқини ҳарбий алянсга айлантиришга уринишлар”ни рад этувчи резолюцияни қабул қилди. Ҳужжат учун 142 нафар депутат овоз берди, 28 нафари қарши чиқди, яна тўрт киши бетараф қолди, деб хабар қилди парламент спикери Золтан Ковач X ижтимоий тармоғида.

Резолюцияда таъкидланишича, Европа Иттифоқи раҳбарияти сўнгги вақтларда “эскалация хавфини оширадиган ва Европани урушга тортиши мумкин бўлган” қарорларни қабул қилмоқда, Украинанинг ЕИга қабул қилиниши эса бутун иттифоқни можаро иштирокчисига айлантиради, чунки бу мамлакат уруш ҳолатида турибди. Ҳужжат муаллифлари, шунингдек, Россиянинг кенг кўламли босқини бошланганидан бери Европа Иттифоқи Украинага 193,3 миллиард евро ажратганини таъкидлаб, бу миқдор Венгриянинг 2004 йилдан бери ўзи олган ёрдамдан қарийб уч баравар кўп эканидан норозилик билдирган.

Резолюция матнини эълон қилган венгер ОАВда, шунингдек, Европа Иттифоқи Венгрия, Чехия ва Словакия иштирокисиз Украинага 90 миллиард евро кредит беришни режалаштираётгани айтилган, шу билан бир пайтда Еврокомиссия ушбу мамлакатлардаги ҳудудий субсидиялар ва аграр тўловларни қисқартириш масаласини кўриб чиқмоқда.

Киев ва Будапешт ўртасидаги можаро январ охирида Украина “Дружба” қувури орқали Венгрия ва Словакияга нефт етказиб беришни тўхтатганидан кейин бошланган. Украина буни қувурга Россия дрони етказган шикаст билан изоҳлаган эди. Ҳар икки мамлакат бош вазирлари Киевни “сиёсий шантаж”да айблади: уларнинг айтишича, Украина Будапештни ўзининг ЕИга аъзолигига қўйилган ветодан воз кечишга мажбурлаш учун қувурни таъмирлашни атайлаб чўзмоқда.

5 март куни Венгрияда Украина давлат “Ощадбанк”ига тегишли икки автомобил ушланди, уларда 40 миллион АҚШ доллари, 35 миллион евро ва тўққиз килограмм олтин бўлган. Венгрия ҳокимияти пул ювиш гумони билан жиноий иш қўзғатди. Улар маълумотига кўра, пул ва қимматбаҳо металлни ташиш гўёки Украина Хавфсизлик хизмати (УХХ)нинг собиқ генерали ва ҳарбий тажрибага эга яна бир неча шахс раҳбарлигида амалга оширилган. Венгрия ташқи ишлар вазири Петер Сийярто Киевдан зудлик билан изоҳ талаб қилиб, мамлакат орқали нақд пул ташилиши “украин ҳарбий мафияси билан эҳтимолий алоқа ҳақида жиддий саволлар туғдираётгани”ни билдирди.

“Бу пуллар Венгрияга ёки унинг ҳукуматига тегишли эмас; улар Украина давлат банки ‘Ощадбанк’, демак, Украина солиқ тўловчиларига тегишли”, — деди 8 март куни Украина ташқи ишлар вазири Андрей Сибиха ва маблағларни қайтаришни талаб қилди. “Ощадбанк” эса ташиш банк билан Австриядаги “Райффайзен” банки ўртасидаги халқаро келишув доирасида амалга оширилганини, юкнинг ўзи эса халқаро ташиш қоидалари ва амалдаги Европа божхона тартиб-таомилларига мувофиқ расмийлаштирилганини таъкидлади.